ایپل کا باحجاب خاتون کا ایموجی متعارف کرانے کا اعلان

ایپل نے اعلان کیا ہے کہ باحجاب خاتون کی نمائندگی کے لیے نیا ایموجی رواں سال کے آخر تک دستیاب ہوگا — فوٹو : سی این این

---

پیغام رسانی کے دوران جذبات اور احساسات کی عکاسی کے لیے استعمال ہونے والے ''ایموجیز'' کے عالمی دن کے موقع پر امریکی کمپنی ایپل نے باحجاب خواتین کی نمائندگی کے لیے نیا ایموجی متعارف کرانے کا اعلان کردیا۔

امریکی میڈیا کی رپورٹ کے مطابق ایپل نے اعلان کیا ہے کہ وہ متعدد نئے ایموجیز پر کام کررہا ہے جن میں ایک باحجاب خاتون، داڑھی والے شخص، یوگا کے ایموجیز شامل ہیں۔ کمپنی کی جانب سے جاری اعلامیے کے مطابق یہ نئے ایموجیز رواں برس کے آخر تک ایپل کے صارفین کو دستیاب ہوں گے۔

😀🌎🌍🌏📆 Happy #WorldEmojiDay! 🎉 We’ve got some 😎 new ones to show you, coming later this year! 👀👇 https://t.co/xBR9ZJ7l4g pic.twitter.com/fhDrr4J5KG

— Tim Cook (@tim_cook) July 17, 2017

دلچسپ بات یہ ہے کہ باحجاب خاتون کے ایموجی کا خیال 16 سالہ سعودی لڑکی رؤف الحمیدی نے ایموجیز بنانے والی غیر منافع بخش تنظیم یونی کوڈ کنسورشیم کو پیش کیا تھا جس نے یہ آئیڈیا ایپل کے ساتھ شیئر کیا اور ایپل نے اسے اپنے سسٹم میں شامل کرنے کی حامی بھری۔

رؤف الحمیدی نے اپنی تجویز منظور ہونے پر خوشی کا اظہار کرتے ہوئے کہا کہ وہ ایپل کی مشکور ہیں جس نے اپنی ڈیوائسز میں یہ ایموجی شامل کرنے کی حامی بھری۔ انہوں نے بتایا کہ اس ایموجی کا خیال ان کے ذہن میں اس لیے آیا کیوں کہ وہ میسجز میں اپنی طرح دکھنے والے ایموجی کا اضافہ چاہتی تھیں۔

ٹوئیٹر پر حجابی ایموجی کی تصاویر وائرل ہونے کے بعد دیگر افراد نے بھی ایپل اور ٹم کُک سے اپنی پسند کے ایموجیز تیار کرنے کا مطالبہ شروع کردیا ہے۔