کراچی کے مختلف علاقوں میں موسلا دھار بارش موسم خوشگوار

محکمہ موسمیات نے شہر میں مزید بارش کی پیشگوئی کردی۔ فوٹو: فائل

---

شہر کے مختلف علاقوں میں موسلادھار بارش سے موسم خوشگوار ہوگیا جب کہ شہری بارش سے لطف اندوز ہوتے رہے۔

ایکسپریس نیوز کے مطابق کراچی میں آج صبح سے موسم شدید گرم تھا اور سورج بھی آگ برسا رہا تھا لیکن اچانک سے شہر پر کالی گھٹائیں چھاگئیں جس کے بعد مختلف علاقوں میں بارشوں کا سلسلہ شروع ہوگیا اور کچھ علاقوں میں موسلا دھار بارش جب کہ دیگر علاقوں میں ہلکی بارش دیکھنے میں آئی۔

شہر قائد میں ڈیفنس، کلفٹن، آئی آئی چندریگر روڈ، گلشن اقبال، اولڈ سٹی ایریا، گلبہار، ناظم آباد، لیاقت آباد، شارع فیصل، اورنگی ٹاؤن سمیت مختلف علاقوں میں بارش ہوئی جس سے شہر کا موسم انتہائی خوشگوار ہوگیا اور شہری بارش سے لطف اندوز ہوتے رہے۔

دوسری جانب محکمہ موسمیات نے شہر میں مزید بارش کی پیشگوئی کرتے ہوئے کہا کہ شہر میں 22 اور 23 جولائی کو تیز بارش کا امکان ہے۔