سعودی فرمانروا شاہ سلمان کے حکم پر شہزادے کو گرفتار کرلیا گیا

کوئی بھی شخص اپنے مقام مرتبے یا خاندانی اثرورسوخ کی بنیاد پر قانون کی خلاف ورزی کرسکتا، شاہ سلمان : فوٹو: فائل

---

سعودی فرمانروا شاہ سلمان بن عبدالعزیز نے شہریوں پر تشدد کرنے والے شہزادے سعود بن عبدالعزیز کی گرفتاری اور قرار واقعی سزا دینے کا حکم دیا تھا جس کی تعمیل کرتے ہوئے سعودی پولیس نے آج صبح سعودی شہزادے کو گرفتار کرلیا ہے۔

سعودی خبررساں ادارے العریبیہ کے مطابق سعودی فرمانروا شاہ سلمان نے انصاف کی بہترین مثال قائم کرتے ہوئے شہریوں پر تشدد کے مرتکب شہزادے سعود بن عبدالعزیز بن مساعد بن سعود بن عبدالعزیز آل سعود کی ساتھیوں سمیت فوری گرفتاری اور اسے قرار واقعی سزا دینے کا حکم دیا تھا جبکہ مقامی پولیس نے آج صبح سعودی دارالحکومت ریاض سے اس شہزادے کو گرفتار کرلیا ہے۔

اس خبرکوبھی پڑھیں: سعودی فرمانروا نے صحافی کو تھپڑ مارنے پر سیکیورٹی آفیسر کو برطرف کردیا

شاہ سلمان کی جانب سے جاری کردہ خصوصی فرمان میں کہا گیا تھا کہ کوئی بھی شخص قانون سے بالا تر نہیں اور نہ ہی کوئی اپنے مقام مرتبے یا خاندانی اثر و رسوخ کی بنیاد پر قانون کی خلاف ورزی کرسکتا ہے اس لئے حکام کو سختی سے تاکید کی جاتی ہے کہ وہ شہریوں پر تشدد کرنے اور ان کی توہین کرنے والے شہزادے اور اس کے ساتھیوں کو فوری طور پر گرفتار کرکے ان کے خلاف قانونی کارروائی شروع کریں اور جب تک شرعی عدالت کوئی فیصلہ نہ دے اس وقت تک شہزادے سمیت کسی کو بھی رہا نہ کیا جائے۔

اس خبرکوبھی پڑھیں: نوجوانوں کو ہدف بنانے والے انتہا پسندوں سے آہنی ہاتھوں سے نمٹیں گے

سعودی فرمانروا نے حکم دیا تھا کہ قانون نافذ کرنے والے ادارے متاثرین کو انصاف فراہم کرنے میں ان کی مدد کریں جب کہ عام شہریوں اور سعودی عرب میں مقیم غیر ملکی باشندوں کی جان ومال اور عزت و آبرو کا تحفظ یقینی بنایا جائے۔

واضح رہے کہ چند روز پہلے سوشل میڈیا پر سعودی شہزادہ سعود بن عبدالعزیز کی ایک ویڈیو وائرل ہوئی تھی جس میں انہیں عام شہریوں کو گالیاں دیتے اور ان پر تشدد کرتے ہوئے دکھایا گیا تھا جس پر شدید عوامی ردِعمل پیدا ہورہا تھا۔