پولیس کی کارروائی شیرشاہ سے 30 لاکھ روپے کی اسمگل شدہ سگریٹ برآمد

گلبرگ میں ڈاکو کو شہریوں نے پکڑ کر پولیس کے حوالے کر دیا، ساتھی فرار۔ فوٹو: فائل

---

پولیس کارروائیوں میں 16ملزمان گرفتارکرکے اسلحہ، منشیات، اسمگل شدہ غیر ملکی سگریٹ کے 20 ہزار پیکٹ اور مسروقہ سامان برآمد کرلیا گیا۔

گلبرگ پولیس نے موسیٰ کالونی میں کارروائی کرتے ہوئے منشیات فروش مخدوم علی عرف انزوکو گرفتار کرکے آدھا کلو چرس برآمد کر لی،چاکیواڑہ پولیس نے لیاری مرزا آدم خان روڈ سے عامر عرف چغت کو گرفتار کرکے ایک کلو چرس برآمد کرلی پولیس کے مطابق ملزم قتل، اسٹریٹ کرائم، ڈکیتی اور منشیات فروشی کے مقدمات میں ملوث ہے ملزم نے دوران تفتیش انکشاف کیا کہ اس نے سال2013 میں اپنے ساتھی کو قتل کردیا تھا۔

ایس ڈی پی او خواجہ اجمیر نگری کی سربراہی میں خواجہ اجمیر نگری پولیس نے سرچ آپریشن کے دوران3ملزمان سلیم ، شاہد اور فرمان کوگرفتار کرکے غیر قانونی اسلحہ برآمد کرلیا،شیرشاہ پولیس نے رہزن عبداللہ اور عارضی رہائشی ایکٹ کی خلاف ورزی کرنے کے الزام میں3 افراد احمد ، عرفان اللہ اور عبد الوہاب کوگرفتارکرلیا جبکہ مالک مکان عبدالطیف فرار ہوگیا، ڈیفنس پولیس نے اسٹریٹ کرائم کی وارداتوں میں ملوث ملزم رئیس زادہ کو گرفتار کرکے اسلحہ اور موٹرسائیکل برآمد کرلی۔

پولیس کے مطابق ملزم کا ساتھی شکیل فرارہوگیا،شیر شاہ پولیس نے اسنیپ چیکنگ کے دوران سوزوکی پک اپ نمبرKV-5148 کو روک کر تلاشی کے دوران40 کارٹن میں سے20 ہزار پیکٹ غیر ملکی اسمگل شدہ ڈن ہل سگریٹ برآمد کرلی جس کی مالیت 30 لاکھ روپے بتائی جاتی ہے، پولیس نے سوزوکی ڈرائیور جہانگیر کو گرفتار کرلیا پولیس کے مطابق ملزم، برآمد سگریٹ اور سوزوکی کسٹم انٹیلی جینس کے حوالے کر دی گئی جبکہ کلری پولیس نے اسٹریٹ کرائم کی وارداتوں میں ملوث ملزم شہریار خان کو گرفتار کرکے ایک ٹی ٹی پستول بمعہ 5 گولیاں، موبائل فون اور نقدی برآمد کرلی۔

ادھر گلبرگ بلاک6 میں 2 ڈاکوؤں نے لوٹ مار کی واردات کے دوران ایک شہری محمد علی قادری کو پستول کے بٹ مارکر زخمی کردیا شہریوں نے ایک ڈاکو سکندر کو پکڑکر اس کے قبضے سے چھینا گیا سامان اور پستول برآمد کرکے ملزم کو تشدد کا نشانہ بنایا اطلاع ملنے پر پولیس موقع پر پہنچ گئی اور ڈاکو کو تحویل میں لے لیا۔

پولیس کے مطابق دوسرا ڈاکو جنید عرف آلو فرار ہوگیا، ڈاکس پولیس نے مچھرکالونی میں کارروائی کرتے ہوئے ملزم نوید گل کو گرفتار کرکے اس کے قبضے سے135گرام چرس برآمد کرلی، شریف آباد پولیس نے2 منشیات فروش محمد جاوید عرف چٹا اور اکرم کو گرفتار کرکے 95 گرام ہیروئن برآمد کرلی، گلشن اقبال پولیس نے ملزم ایوب ظہیر زادہ کو گرفتار کرکے 250 گرام سے زائد چرس اور غیر ملکی کرنسی برآمد کر لی۔