شہباز شریف نے جنگلا بس سروس چلاکر پنجاب کو کنگال کردیاپرویزالہی

نوازشریف پہلے اپنے گھرپر نظر دوڑائیں پھرملک کی بات کریں, چوہدری پرویزالہیٰ . فوٹو : فائل

---

نائب وزیراعظم اور مسلم لیگ کے رہنما چوہدری پرویز الٰہی نے کہا ہے مسلم لیگ (ن) کے نمائندے سن سکتے ہیں نہ بول سکتے ہیں،شہباز شریف نے جنگلا بس سروس چلاکر سارے پنجاب کو کنگال کردیا ہے۔

سمبڑیال میں جلسہ عام سے خطاب کرتے ہوئے نائب وزیراعظم چوہدری پرویز الٰہی نے کہا کہ مسلم لیگ ق نے پنجاب حکومت چھوڑی تو خزانےمیں سو ارب روپےسے زائد رقم موجود تھی لیکن شریف برادران نے پیلی ٹیکسی،آشیانہ اسکیم،مکینیکل تندور اوربس سروس کی مد میں فنڈ ضائع کر دیئے۔ اگر مسلم لیگ(ن) کو انتخابات میں شکست نہ دی تو صوبے کے مختلف علاقوں میں بنی بنائی چیزیں بھی لاہور چلی جائیں گی۔

چوہدری پرویز الٰہی کا کہنا ہے کہ نواز شریف سندھ میں بری حکمرانی کی بات کرتے ہیں، پنجاب میں کونسی اچھی حکمرانی ہے، نواز شریف سندھ میں جاکر امن و امان کی خراب صورتحال پر بات کرتے ہیں، نواز شریف پہلے اپنے گھرپر نظر دوڑائیں پھرملک کی بات کریں۔

نائب وزیر اعظم نے مزید کہا کہ پنجاب میں گورننس نام کی کوئی چیز نہیں،لاہورمیں روزانہ سوڈکیتیاں ہورہی ہیں۔ آج اگر صوبے میں گیس اور بجلی نہیں تو یہ سب شہباز شریف کی وجہ سے ہے، اگر شہباز شریف چوہدری شجاعت کا منصوبہ مان لیتے تو صرف 4 گھنٹے کی لوڈ شیڈنگ رہ جاتی۔