راجگال آپریشن سیکیورٹی فورسز نے دہشتگردوں کے اہم ٹھکانے کو کلیئر کرالیا

اس ٹھکانے کو سرحد عبور کرنے کے لیے بطور ٹرانزٹ پوائنٹ استعمال کیا جاتا تھا، آئی ایس پی آر

ویب ڈیسک August 04, 2017

ایف سی بلوچستان نے جشن آزادی پر دہشت گردی کا منصوبہ بھی ناکام بنادیا، آئی ایس پی آر — فوٹو : فائل

راجگال میں سیکیورٹی فورسز نے دہشت گردوں کے ایک اہم ٹھکانے کو کلیئر کرا لیا جسے سرحد عبور کرنے کے لیے بطور گزرگاہ استعمال کیا جاتا تھا۔

پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا کہ آپریشن رد الفساد پلان کے مطابق جاری ہے اور اس سلسلسے میں راجگال میں آپریشن خیبر 4 کے دوران دہشت گردوں کے اہم ٹھکانے کو کلیئر کرا لیا گیا جسے ٹرانزٹ پوائنٹ کے طور پر استعمال کیا جاتا تھا۔ اس کے علاوہ کور کمانڈر پشاور نے آئی جی ایف سی خیبرپختونخوا کے ہمراہ علاقے کا دورہ بھی کیا۔

[fb-post-embed url="https://www.facebook.com/OfficialDGISPR/posts/1756013634696083/"]

آئی ایس پی آر کی جانب سے جاری بیان میں یہ بھی کہا گیا کہ ایف سی بلوچستان نے جشن آزادی کے دوران دہشتگرد حملے کی منصوبہ بندی کو بھی ناکام بنا دیا ہے۔ ایف سی کے دستوں نے خفیہ اطلاعات پر بلوچستان کے ضلع ژوب کے علاقے کچھ مینا میں کارروائی کی جس کے دوران ایک سہولت گار گرفتار ہوا جو دہشت گردوں کے ٹھکانے کی حفاظت پر مامور تھا۔ کارروائی کے دوارن فورسز نے دیسی ساختہ بم، دھماکا خیز مواد اور دیگر سامان بھی برآمد کیا جبکہ ٹھکانے کو تباہ کردیا گیا۔