کراچی میں دو دن میں دوسری بینک ڈکیتی ڈاکو لاکھوں روپے لوٹ کر فرار

بینک کے عملے نے پولیس کو تاخیر سے اطلاع دی جس کی وجہ سے ڈاکو فرار ہوگئے، پولیس

ویب ڈیسک August 09, 2017

ملزمان کاونٹر پر رکھے ہوئے6 لاکھ روپے اور گارڈ کا اسلحہ چھین کر لے گئے؛فوٹوفائل

KARACHI: کھارادر میں ڈاکو نجی بینک سے لاکھوں روپے اور سیکیورٹی گارڈز کا اسلحہ چھین کر فرار ہوگئے۔

شہر قائد میں ان دنوں ڈاکوؤں کا راج قائم ہے، کراچی میں دو دن میں دوسری بینک ڈکیتی نے لوگوں کو خوف وہراس میں مبتلا کردیا ہے۔ کراچی کے علاقے کھارادر کی کلاتھ مارکیٹ میں 5 ملزمان ماسک اور ہیلمٹ پہن کر داخل ہوئے، پہلے انہوں نے بینک کے گارڈ کو قابو کیا پھر عملے کو یرغمال بناکر کاؤنٹر پر رکھی ہوئی 6 لاکھ روپے کی رقم اور گارڈ کا اسلحہ چھین کر فرار ہوگئے۔

اس خبرکوبھی پڑھیں: کراچی میں بینک ڈکیتی کے دوران مزاحمت پر منیجر قتل

واقعہ کی اطلاع ملتے ہی پولیس موقع پر پہنچ گئی، تاہم پولیس نے بینک کو سیل کرکے تفتیش کا آغاز کردیاہے، پولیس کا کہنا ہے کہ بینک کے عملے نے پولیس کو تاخیر سے اطلاع دی جس کے باعث ڈاکو فرار ہونے میں کامیاب ہوئے۔

دوسری جانب بینک مینجر کا کہنا ہےکہ لاکر میں رکھے ہوئے 52 لاکھ روپےلوٹنے سے بچ گئے ہیں شاید ڈاکوؤں کو اس رقم کے بارے میں علم نہیں تھا۔

اس خبرکوبھی پڑھیں: کراچی میں بینک ڈکیتی ، ڈاکو57 لاکھ روپے لوٹ کرفرار

آئی جی سندھ نے واقعہ کا نوٹس لیتے ہوئے رپورٹ طلب کرلی ہے کہ دن دیہاڑے ڈکیتی کی اتنی بڑی واردات کیسے پیش آئی اور علاقہ پولیس اس وقت کہاں تھی واقعہ کی مکمل تحقیقات کرکے جلد سے جلد مجھے رپورٹ پیش کی جائے۔

واضح رہے کہ یہ کراچی میں دو دن میں دوسری جب کہ رواں سال کی نویں بینک ڈکیتی ہے، گزشتہ روز کراچی کے علاقے شارع قائدین میں ڈکیتی کے دوران ملزمان کی فائرنگ سے بینک مینجر ہلاک ہوگیا تھا۔