چین کے نائب وزیراعظم 2 روزہ دورے پر اسلام آباد پہنچ گئے

وانگ یانگ 14 اگست کو پرچم کشائی کی تقریب میں مہمان خصوصی کی حیثیت سے شرکت کریں گے۔ فوٹو: فائل

---

چین کے نائب وزیراعظم وانگ یانگ دو روزہ دورے پر وفاقی دارالحکومت اسلام آباد پہنچ گئے ہیں۔

چین کے صدر شی جن پنگ کی خصوصی ہدایت پر نائب وزیراعظم وانگ یانگ خیر سگالی دورے پر اسلام آباد پہنچے ہیں جہاں وہ پاکستان کی 70 سالہ یوم آزادی کی تقریبات میں شرکت کریں گے۔

نائب وزیراعظم وانگ یانگ دورے کے موقع پر صدر ممنون حسین اور وزیراعظم شاہد خاقان عباسی سے ملاقات کریں گے جس میں دوطرفہ تعلقات کو مزید بہتر بنانے سمیت مختلف امور پر تبادلہ خیال کیا جائے گا۔ وانگ یانگ 14 اگست کو پرچم کشائی کی تقریب میں مہمان خصوصی کی حیثیت سے شرکت کریں گے۔

چینی نائب وزیراعظم وانگ یانگ کا خصوصی دورہ پاکستان اور چین کے درمیان برادرانہ اور تعاون پر مبنی قریبی تعلقات اور پاکستان کیلئے چین کی مضبوط سیاسی حمایت کی علامت ہے۔