شرجیل خان کی باکسنگ ٹریننگ سوشل میڈیا پر مذاق بن گئی

ایسا لگتا ہے کہ کرکٹرنے شاید نوشتہ دیوارپڑھ لیاہے،فوٹو:سوشل میڈیا

---

اسپاٹ فکسنگ کیس میں معطل کرکٹر شرجیل خان نے اپنے لیے نیا میدان ڈھونڈ لیا،ان کی باکسنگ ٹریننگ ویڈیو کی سوشل میڈیا پرخوب خبرلی جارہی ہے۔

پی ایس ایل سیزن ٹو کے آغاز میں ہی اسپاٹ فکسنگ کیس سامنے آنے پر پی سی بی نے 5 کھلاڑیوں کو معطل کیا جن میں اسلام آباد یونائیٹڈ کےاوپنرشرجیل خان بھی شامل تھے،ان کے خلاف کیس ٹریبیونل میں زیرسماعت ہےاورفیصلہ جلد متوقع ہے، کرکٹرنے شاید اپنا نوشتہ دیوارپڑھ لیاہے اوراب کرکٹ چھوڑکرباکسنگ رنگ میں کود پڑے ہیں، سوشل میڈیا پرجاری ہونے والی ایک ویڈیو میں دیکھا جا سکتا ہے کہ شرجیل خان سابق قومی باکسر زاہد بلوچ کے ساتھ باکسنگ ٹریننگ کر رہے ہیں، ویڈیو سے ظاہرہوتا ہے کہ شرجیل باکسنگ سے بالکل نابلد ہیں اوربہت آہستگی سے پنچ لگا رہے ہیں جن میں اسپیڈ اور پاور کا فقدان ہے۔

اس ویڈیو کو دیکھنے والوں نے اس پر طرح طرح کے تبصرے بھی کئے ہیں۔ ایک صارف نے لکھا کہ پاکستانی ٹیلنٹڈ نوجوان نے چند پیسوں کیلیے اپنا کیریئر تباہ کر لیا جبکہ ایک دوسرے صارف کے مطابق شاید وہ ایسا کرکے پی سی بی کی توجہ حاصل کرنا چاہتے ہیں۔ ایک اور صارف نے تو ان کے بچگانہ پنچز دیکھ کر یہاں تک کہہ دیا کہ میری دادی اماں اس سے زیادہ طاقت سے پنچ لگا سکتی ہیں۔