کراچی میں 4 جعلی پولیس اہلکاروں سمیت 11 ملزمان گرفتار

جعلی اہلکار گلستان جوہر میں پکڑے گئے، دیگر ملزمان سے اسلحہ، منشیات اور مسروقہ موٹرسائیکل برآمد

Staff Reporter August 21, 2017

جعلی اہلکار گلستان جوہر میں پکڑے گئے، دیگر ملزمان سے اسلحہ، منشیات اور مسروقہ موٹرسائیکل برآمد۔ فوٹو: ایکسپریس نیوز

پولیس نے 4 جعلی پولیس اہلکار سمیت11 ملزمان کو گرفتار کر کے اسلحہ، منشیات اور دیگر سامان برآمد کر لیا۔

شارع فیصل پولیس نے گلستان جوہر میں ناکہ لگا کر پولیس کی یونیفارم میں ملبوس 4 افراد فیصل، ارسلان فیضان اور محسن کو اسنیپ چیکنگ کرتے ہوئے گرفتار کر لیا تاہم پولیس کے مطابق ملزمان جعلی اہلکار ہیں جو اپنے آپ کو پولیس اہلکار ظاہر کر کے شہریوں سے لوٹ مار میں مصروف تھے ملزمان کے خلاف 170 ، 171/34 کے تحت مقدمہ درج کر کے تحقیقات کا آغاز کر دیا گیا۔

دوسری جانب لیاقت آباد پولیس نے سندھی ہوٹل کے قریب سے ملزم طارق کو گرفتار کر کے اسلحہ ، آئس ( ICE ) کے پیکٹ اور آدھا کلو چرس برآمد کر لی۔ بغدادی پولیس نے ملزم سید احمد علی شاہ عرف کاٹن شاہ کو گرفتار کر کے آوان بم اور پستول برآمد کر لیا جب کہ ٹیپو سلطان پولیس نے اسٹریٹ کرائم کی وارداتوں میں ملوث4 ملزمان ملزم شمیر، سونو یعقوب ، محمد دین عرف دھیما اور یاسر کو گرفتار کر کے 2 ٹی ٹی پستول ، بلوچ کالونی اور جمشید کوارٹر تھانے کی حدود سے چوری شدہ2 موٹر سائیکلیں ، نقدی و دیگر مسروقہ سامان برآمد کر لیا، علاوہ ازیں مدینہ کالونی پولیس نے ملزم نبی بخش کو گرفتار کر لیا۔