برطانیہ میں نادیہ جمیل کو نسل پرستی کی بنیاد پر ہوٹل سے نکال دیا گیا

اطالوی ریسٹورینٹ ڈان پاسکل نے نادیہ جمیل کے الزام کی تردید کردی

ویب ڈیسک August 23, 2017

والد کی داڑھی کی وجہ سے ہمیں امتیازی سلوک کا نشانہ بنایا گیا، نادیہ جمیل کا الزام۔ فوٹو: فائل

برطانیہ میں ریسٹورینٹ کی انتظامیہ نے معروف پاکستانی اداکارہ نادیہ جمیل اور ان کے والد کو امتیازی سلوک کا نشانہ بناتے ہوئے ہوٹل سے ہی نکال دیا۔

نادیہ جمیل نے سماجی رابطوں کی ویب سائٹ ٹوئٹر پر جاری بیان میں الزام لگایا کہ انگلینڈ میں انہیں پہلی بار نسلی امتیازی سلوک کا نشانہ بنایا گیا۔ نادیہ جمیل نے کہا کہ مین مارکیٹ اسکوائر کے علاقے میں واقع اطالوی ریسٹورینٹ ڈان پاسکل میں ان کے ساتھ امتیازی سلوک کیا گیا، ریسٹورینٹ نے مجھے اور میرے والد کو کھانا فراہم کرنے سے انکار کرتے ہوئے چلے جانے کو کہا۔ نادیہ جمیل نے دعویٰ کیا کہ ان کے والد کی داڑھی کی وجہ سے انہیں امتیازی سلوک کا نشانہ بنایا گیا۔

1st racist encounter in England. #DonPascual Italian restaurant in Main Market Square refused 2 serve Aba & me & asked us 2 leave!His beard!
— Nadia Jamil (@NJLahori) August 21, 2017

دوسری جانب اطالوی ریسٹورینٹ ڈان پاسکل نے نادیہ جمیل کے الزام کی تردید کرتے ہوئے صارفین سے کہا کہ ٹوئٹر پر کہی گئی ہر بات پر یقین نہ کریں، ہم نے نادیہ جمیل کو سروس دینے سے انکار نہیں کیا، ہم سب کا خیرمقدم کرتے ہیں، عملے کی کمی کی وجہ سے انہیں مینیو دینے میں تاخیر ہوئی جس پر انہوں نے تنازع کھڑا کردیا، ہم 40 سال سے کام کررہے ہیں اس دوران ہم نے کبھی کسی کے ساتھ مذہب اور نسل کی بنیاد پر تفریق نہیں کی۔ نادیہ غلط بیانی کرکے واقعے کو بالکل غلط رنگ دے رہی ہیں۔

This is a TRUE depiction of the event from earlier today pic.twitter.com/lYcFEM4fhS
— Pasquale Benedetto (@PasckyBenedetto) August 21, 2017

نادیہ جمیل نے ڈان پاسکل کی وضاحت پر ردعمل ظاہر کرتے ہوئے کہا کہ پہلے آپ لوگوں نے ہمیں مینیو نہیں دیا، اور پھر کھانے دینے سے بھی انکار کردیا گیا۔ بالآخر آپ نے ہمارے ہاتھوں سے مینیو بھی چھین لیا، ہم پر چیخے چلائے اور ریسٹورینٹ سے نکل جانے کا کہا گیا۔

It's a teeny beard. They found our appearance annoying. He said is it my beard. Although it the cutest beard on Earth :)! pic.twitter.com/i9kiEsMHv0
— Nadia Jamil (@NJLahori) August 21, 2017

نادیہ جمیل نے کہا کہ میرے 73 سالہ والد جو کینسر کے مریض ہیں ، ان کی تذلیل اور توہین کی گئی۔ ٹوئٹر پر نادیہ جمیل کے پرستاروں نے واقعے کی سخت مذمت کرتے ہوئے ان سے اظہار یکجہتی کیا۔