نیوزی لینڈ کے قانون میں ترمیم آسٹریلوی حکومت کے لیے خطرہ بن گئی

وزیراعظم سمیت پوری پارلیمان نااہل ہوسکتی ہے

ندیم سبحان میو August 24, 2017

وزیراعظم سمیت پوری پارلیمان نااہل ہوسکتی ہے فوٹو : فائل

آسٹریلیا میں گذشتہ ایک ماہ کے دوران دو سینیٹر مستعفی ہوگئے۔ اسکاٹ لڈلم اور لاریسا واٹرز کے مستعفی ہونے کی وجہ ان کی دہری شہریت تھی۔ دونوں آسٹریلوی شہری ہونے کے ساتھ ساتھ بالترتیب نیوزی لینڈ اورکینیڈا کی شہریت بھی رکھتے تھے۔

پارلیمان کا رکن بننے سے پہلے ہی یہ ان ممالک کے شہری تھے۔ تاہم حیران کُن بات یہ ہے کہ دونوں ہی آسٹریلوی آئین کی اس دفعہ سے ناواقف تھے جو دہری شہریت کے حامل افراد کو پارلیمان کے لیے نااہل قرار دیتی ہے۔

اسکاٹ اور لاریساکا تعلق گرین پارٹی سے ہے۔ آسٹریلوی پارلیمان میں ان دو کے علاوہ بھی کئی اراکین دہری شہریت رکھتے ہیں جن کے مستعفی ہونے کی توقع ہے۔ اس طرح دہری شہریت کا معاملہ ایک بحران کی سی صورت اختیار کرتا دکھائی دے رہا ہے۔ ماہرین قانون کہتے ہیں کہ اگر آئین کی دفعہ 44 پر عمل کیا جائے تو یہ بحران سنگین تر ہوجائے گا کیوں کہ اس دفعہ کا اطلاق کرنے پر موجودہ اراکین میں سے کوئی ایک رکن بھی پارلیمان کا اہل نہیں رہے گا، پوری پارلیمان خالی ہوجائے گی! اس سے بھی زیادہ حیران کُن بات یہ ہے کہ ماہرین قانون کے مطابق اس کا ذمہ دار نیوزی لینڈ ہوگا !

بیرسٹر رابرٹ انگیال اپنے بلاگ میں لکھتے ہیں کہ آسٹریلوی آئین کی دفعہ چوالیس کے تحت کوئی بھی شخص جس نے کسی بیرونی طاقت سے وفاداری کا حلف اٹھا رکھا ہو یا وہ کسی بیرونی طاقت کی جانب سے حقوق اور سہولیات کا حق دار ہو، وفاقی پارلیمان کی رکنیت حاصل کرنے کا اہل نہیں۔ ماہر قانون کہتے ہیں کہ نیوزی لینڈ کے قانون میں کی جانے والی حالیہ ترمیم کے بعد اب آسٹریلوی شہریوں کو نیوزی لینڈ میں مستقل سکونت اختیار کرنے یا وہاں کام کرنے یا حصول علم کی غرض سے جانے کے لیے ویزے کی ضرورت نہیں۔ اس کا مطلب کہ ہوا کہ نیوزی لینڈ نے ہر آسٹریلوی شہری کو اپنی سرزمین پر رہائش اختیار کرنے، روزگار کمانے اور تعلیم حاصل کرنے کا حق دے دیا ہے، اور ظاہر ہے کہ نیوزی لینڈ ایک الگ ملک، ایک الگ غیرملکی طاقت ہے۔

واضح رہے کہ آسٹریلیا اور نیوزی لینڈ دونوں ہمسایہ ممالک ہیں تاہم ان کے درمیان کم ازکم فاصلہ ڈھائی ہزار میل ہے۔ نیوزی لینڈ کے قوانین میں ہونے والی اس ترمیم کے بعد آسٹریلوی آئین کی دفعہ چوالیس کی تشریح کی رُو سے کوئی بھی آسٹریلوی شہری رُکن پارلیمان بننے کا اہل نہیں کیوں کہ اسے ایک دوسرے ملک نے کئی حقوق دے دیے ہیں۔

آسٹریلیا میں اراکین پالیمان کی دہری شہریت کا معاملہ پیچیدہ رُخ اختیار کرتا نظر آرہا ہے کیوں کہ گرین پارٹی کے دو سینیٹروں کے علاوہ دوسری پارٹیوں کے کئی اراکین کے بارے میں ذرائع ابلاغ دعوے کررہے ہیں کہ وہ بھی دہری شہریت کے حامل ہیں۔ اس تناظر میں مزید اراکین کے استعفی متوقع ہیں، اور اگر بیرسٹر رابرٹ انگیال کا کہنا ہے درست ہے تو پھر پارلیمان کو بچانے کے لیے آسٹریلوی آئین میں ترمیم کرنی پڑے گی بہ صورت دیگر پوری پارلیمان نااہل ہوجائے گی !