مہمند ایجنسی میں آپریشن کے دوران بھاری مقدارمیں اسلحہ برآمد

ہلکا پلندرہ میں آپریشن ردالفساد کے دوران انٹیلی جنس اطلاعات کی بنیاد پر کارروائی کی گئی اور اس دوران دہشتگردوں کے ٹھکانے سے بھاری مقدارمیں اسلحہ و بارود برآمد ہوا ہے۔

پاک فوج کے شعبہ تعلقات عامہ (آئی ایس پی آر) کے مطابق ملک بھر میں آپریشن ردالفساد جاری ہے۔ پاک فوج کی جانب سے مہمند ایجنسی کے علاقے ہلکا پلندرہ میں دہشت گردوں کی کمین گاہ کی موجودگی کی اطلاع پرآپریشن کے نتیجے میں بھاری مقدارمیں اسلحہ برآمد کیا گیا۔


آئی ایس پی آرکے مطابق آپریشن کے نتیجے میں خود کش جیکٹس، آئی ای ڈیز، راکٹ، ہینڈ گرنیڈ، ڈیٹونیٹرز، دھماکہ خیز مواداور مواصلاتی آلات برآمد کیے گئے۔

واضح رہے کہ ملک بھرمیں آپریشن ردالفساد کے تحت دہشتگردوں کے متعدد ٹھکانے تباہ کیے جاچکے ہیں جب کہ آپریشن کے تحت دہشتگردوں کی گرفتاری سمیت ان سے بھاری مقدار میں اسلحہ بر آمد کیا جاچکا ہے۔