شاہ رخ کا فرح خان کوسرپرائز

شاہ رخ اور فرح خان ایک دوسرے کے گہرے دوست ہیں۔ فوٹو: فائل

---

بالی ووڈ کے بادشاہ شاہ رخ خان معروف کوریو گرافر فرح خان سے ملاقات کے لیے ان کے رئیلٹی شو کی شوٹنگ میں جاپہنچے جس سے ان کی دوست ناصرف خوش ہوگئیں بلکہ دونوں نے ایک ساتھ کافی وقت بھی گزارا۔

بالی ووڈ کے بادشاہ شاہ رخ خان اور کوریو گرافر فرح خان کے درمیان گہری دوستی کچھ عرصہ قبل دشمنی میں بدل گئی تھی لیکن دونوں کو اپنی غلطی کا احساس ہوا اور ایک دوسرے سے گلے شکوے دور کردیے۔ دونوں کی دوستی میں اب ویسی تو بات نہیں لیکن بظاہر رنجشیں بھی نہیں اور اس بات کو ثابت کرنے کے لیے شاہ رخ خان اچانک ہی فرح خان کے رئیلٹی شو کی شوٹنگ میں جاپہنچے۔

بھارتی میڈیا کے مطابق شاہ رخ خان ممبئی کے یش راج اسٹوڈیو میں اپنے ٹی وی شو کی شوٹنگ کرارہے تھے اسی دوران انہیں معلوم ہوا کہ اسی اسٹوڈیو میں اس وقت فرح خان بھی موجود ہیں جو کہ ایک مقبول امریکی ٹی وی شو کے ہندی ورژن کی شوٹنگ کرارہی ہیں۔ یہ معلوم ہوتے ہی شاہ رخ خان فوراً وہاں جا پہنچے۔ کنگ خان کو شو کے سیٹ پر دیکھ کر فرح خان بہت خوش ہوئیں اور دونوں نے کافی وقت ایک ساتھ گزارا۔