دل کے عارضے میں مبتلا نوزائیدہ پاکستانی بچے کو بھارتی ویزا جاری

روحان کی والدہ نے ٹوئیٹر پر بھارتی وزیر خارجہ سے ویزا جاری کرنے کی درخواست کی تھی۔ فوٹو : فائل

---

بھارتی وزیر خارجہ سشما سوراج کی خصوصی ہدایت پر بھارتی ہائی کمیشن نے دل کے عارضے میں مبتلا نوزائیدہ پاکستانی بچے کو طبی ویزا جاری کردیا۔

سماجی رابطوں کی ویب سائٹ ٹوئیٹر پر پاکستانی بچے روحان کی والدہ مہوش مختار نے ایک پوسٹ شیئر کی تھی جس میں انہوں نے لکھا تھا کہ ان کے بیٹے کو پیدائشی طور پر دل کی بیماری ہے اور اسے علاج کی غرض سے بھارت لے جانا نہایت ضروری ہے۔

My son need treatment. Why he suffers. Request issuance of urgent medical visa.#HelpBabyRohaan @Sushmaswaraj

— Mehwish Mukhtar (DJ) (@djmehwish) August 28, 2017

مہوش نے اس پوسٹ پر بھارتی وزیر خارجہ سشما سوراج کو مخاطب کرتے ہوئے ان سے درخواست کی تھی کہ انہیں جلد از جلد بھارت کا ویزا جاری کیا جائے۔ سشما سوراج نے اس کا نوٹس لیتے ہوئے پاکستان میں بھارتی ہائی کمیشن کو ہدایات جاری کی تھیں کہ اس معاملے پر غور کیا جائے اور ویزے کا اجراء یقینی بنایا جائے۔

We will give medical visa for his treatment in India. @IndiainPakistan @djmehwish @MeTheFixer pic.twitter.com/w4zpGZEgNc

— Sushma Swaraj (@SushmaSwaraj) August 29, 2017

بعد ازاں بھارتی ہائی کمیشن نے ٹوئیٹر پر پیغام جاری کیا کہ پیارے روحان ، آپ کا ویزا جاری ہوچکا ہے اور جلد اسے لاہور بھیج دیا جائے گا۔

Dear Rohaan, your visa has been issued and dispatched to Lahore today itself. All the very best. @SushmaSwaraj @djmehwish @MeTheFixer

— India in Pakistan (@IndiainPakistan) August 29, 2017

خیال رہے کہ 15 اگست کو بھارت کے یوم آزادی کے موقع پر وزیرخارجہ سشما سوراج نے اعلان کیا تھا کہ علاج کی غرض سے بھارت آنے کے خواہش مند پاکستانیوں کو ویزے جاری کیے جائیں گے۔

پاکستان اور بھارت کے درمیان تعلقات میں وقتاً فوقتاً آنے والی کشیدگی کی وجہ سے دونوں ملکوں کے شہریوں کو ویزہ حاصل کرنے میں مشکلات کا سامنا کرنا پڑتا ہے۔