شاداب خان بگ بیش لیگ میں بھی اپنے جوہر دکھائیں گے

قومی کرکٹر شاداب خان آسٹریلیا کی بگ بیش لیگ کے اگلے سیزن میں برسبین ہیٹ کی نمائندگی کریں گے۔


نوجوان کرکٹر نے پی ایس ایل میں شاندار کارکردگی کے بعد قومی ٹیم میں شمولیت اختیار کی تھی اور چیمپئنز ٹرافی فائنل میں 2 وکٹیں حاصل کرتے ہوئے گرین شرٹس کی فتح میں اہم کردار ادا کیا تھا۔ اسپنر ان دنوں کریبیئن پریمیئر لیگ کھیل رہے ہیں، نومبر میں ہونے والی بنگلا دیش پریمیئر لیگ کیلیے بھی منتخب کیا جا چکا ہے جس کے بعد دسمبر میں وہ بگ بیش میں برسبین ہیٹ کی نمائندگی کریں گے۔

واضح رہے کہ شاداب خان نے 4 ٹی ٹوئنٹی انٹرنیشنلز میں 4.73 کی اوسط سے 10 وکٹیں حاصل کر رکھی ہیں جبکہ 7 ون ڈے انٹرنیشنلز میں 9 وکٹیں اپنے نام کر چکے ہیں۔