بھارتی کرکٹر نے بیچ سڑک پر بزرگ شہری کو تشدد کا نشانہ بناڈالا

بزرگ شہری نے امباتی کو گاڑی آہستہ لانے کا مشورہ دیا تووہ اس پر بھڑک اٹھے

ویب ڈیسک September 01, 2017

بھارتی شہری نے کرکٹر کو کار آہستہ چلانے کا مشورہ دیا جس پر وہ بھڑک گئے؛فوٹوفائل

بھارتی کرکٹر امباتی رائیڈو نے بھارتی شہر حیدر آباد میں سڑک کے بیچوں بیچ بزرگ شہری کو مار مار کر حالت خراب کردی۔

بھارتی میڈیا کے مطابق امباتی اپنی کار میں تیزرفتاری کے ساتھ حیدرآباد میں واقع راجیو گاندھی انٹرنیشنل ائیرپورٹ جارہے تھےاور اسی وقت مارننگ واک پر نکلے شہری بھی سڑکوں پرچہل قدمی کررہے تھے، تاہم کرکٹر کی تیز رفتاری دیکھ کر سڑک پر موجود ایک شہری سے رہا نہ گیا اور انہوں نے امباتی کی کار کو رکنے کا اشارہ کیا۔

کاررکنے کے بعد شہری نے امباتی کو کار آہستہ چلانے کا مشورہ دیا ، اس شہری کا مقصد انہیں پریشان کرنا نہیں تھا بلکہ انہوں نے یہ مشورہ کسی بھی ممکنہ حادثے سے بچنے کے لیے دیا تھا لیکن امباتی کو بزرگ شہری کا مشورہ زیادہ پسند نہیں آیا اور انہوں نے غصے میں کار سے اتر کر پہلے تو اس بیچارے پر چلانا شروع کردیا بعد ازاں اس کی اتنی درگت بنائی کہ وہاں موجود لوگوں کو امباتی سے اس شخص کو چھڑانا مشکل ہوگیا۔

#WATCH: Cricketer Ambati Rayudu seen in scuffle with a man allegedly after argument over rash driving in Hyderabad (Unverified video source) pic.twitter.com/r1pdq5Lh9g
— ANI (@ANI) August 31, 2017

اس تمام واقعے کی ویڈیو منظر عام پر آنے کے بعدکرکٹر امباتی رائیڈو کو لوگوں کی جانب سے شدید تنقید کا نشانہ بنایا جارہا ہے تاہم ابھی تک ان کی جانب سے اپنے کیے پر شرمندگی کا اظہار کرنے اور بزرگ شہری سے معافی طلب کرنے کی کوئی اطلاع منظر عام پر نہیں آئی۔