ایم کیوایم رہنما خواجہ اظہارالحسن پر قاتلانہ حملہ پولیس اہلکار اور بچہ جاں بحق

حملے میں خواجہ اظہارالحسن محفوظ رہے جب کہ جوابی فائرنگ سے ایک حملہ آور ہلاک ہوگیا

ویب ڈیسک September 02, 2017

خواجہ اظہار نماز عید ادا کرنے کے بعد باہر نکل رہے تھے کہ گھات لگائے دو حملہ آوروں نے ان پر فائرنگ کردی۔ فوٹو: فائل

ایم کیو ایم پاکستان کے رہنما اور سندھ اسمبلی میں اپوزیشن لیڈر خواجہ اظہار الحسن پر قاتلانہ حملے میں پولیس اہلکار سمیت 2 افراد جاں بحق اور متعدد زخمی ہوگئے۔

ایکسپریس نیوز کے مطابق کراچی کے علاقے بفرزون میں ایم کیو ایم پاکستان کے رہنما خواجہ اظہار الحسن پر قاتلانہ حملے میں پولیس اہلکار اور ایک بچہ جاں بحق ہوگیا جبکہ جوابی فائرنگ سے ایک حملہ آور بھی ہلاک ہوگیا۔ حملے میں خواجہ اظہارالحسن محفوظ رہے۔

ایم کیو ایم کے رہنما نماز عید ادا کرنے کے بعد گھر واپس آرہے تھے کہ پہلے سے گھات لگائے دو حملہ آوروں نے ان پر فائرنگ کردی جس کے نتیجے میں ایک پولیس اہلکار اور ایک بچہ جاں بحق جب کہ 5 افراد زخمی ہوگئے۔ ایم کیو ایم رہنما کے گارڈز کی جوابی فائرنگ سے ایک حملہ آور بھی ہلاک ہوگیا۔

ایم کیو ایم کے رہنما فیصل سبزواری نے ٹوئٹر پر واقعے کی اطلاع دیتے ہوئے بتایا کہ حملہ آور پولیس کی وردی میں ملبوس تھے۔ ایس ایس پی سینٹرل پیر محمد شاہ نے بتایا کہ حملہ آوروں کی تعداد دو تھی جنہوں نے ہیلمٹ پہنے ہوئے تھے جب کہ جائے وقوعہ سے 9 ایم ایم پسٹل کے 27 خول ملے ہیں۔

پاکستان پیپلزپارٹی کے چیئرمین بلاول بھٹو زرداری، پی ایس پی کے سینیئر وائس چیئرمین ڈاکٹر صغیر احمد، جماعت اسلامی کراچی کے امیر حافظ نعیم الرحمان نے خواجہ اظہار الحسن پر حملے کی مذمت کرتے ہوئے واقعے میں ملوث عناصر کے خلاف کارروائی کا مطالبہ کیا ہے۔

دوسری جانب ایم کیوایم پاکستان کے سربراہ ڈاکٹرفاروق ستار نے میڈیا کے نمائندوں سے بات کرتے ہوئے کہا کہ ہمیں لندن سے دھمکیاں مل رہی ہیں، لندن سے آڈیو پیغام آئے جو کسی سے ڈھکے چھپے نہیں جب کہ جنوبی افریقا سے آنے والے معاملات بھی سب کے سامنے ہیں۔