قومی کرکٹرز کی جانب سے اہل وطن کو عید کی مبارکباد

قومی کرکٹرز نے عید الاضحیٰ پر سماجی رابطے کی مائیکرو بلاگنگ ویب سائٹ پر تمام اہل وطن کو نیک تمناؤں اور پر خلوص جذبات کے ساتھ عید کی مبارکباد دی۔

ملک بھر میں عید الاضحیٰ مذہبی جوش و جذبے سے منائی جارہی ہے اس حوالے سے پاکستان قومی کرکٹ ٹیم کے ستاروں نے عید کے اس پُرمسرت موقع پر تمام اہل وطن کو مبارکباد پیش کی۔

قومی ٹیم کے کپتان سرفراز احمد نے عید کے پُر مسرت موقع پر اپنے مداح کے ساتھ تصویر شیئر کرتے ہوئے سب کو عید کی مبارک باد دی۔



اسٹار آل راؤنڈر شاہد آفریدی نے سماجی رابطے کی ویب سائٹ ٹویٹر پر قوم کو عید کی مبارک باد دیتے ہوئے کہا کہ اللہ تعالیٰ عید کے موقع پر ہم سب پر اپنی رحمتوں اور برکات کا نزول فرمائے۔

شعیب ملک نے اپنی اور اپنے اہلخانہ کی جانب سے قوم کو عید مبارک باد دیتے ہوئے ضرورت مندوں کی مدد کرنے کا پیغام دیا۔

آل راؤنڈر محمد حفیظ نے عید کی مبارک باد دیتے ہوئے پیغام دیا کہ متحد رہیں، کامیابی کے لئے سب کے ساتھ مل کر کام کریں اور عید پر سب کا خیال رکھیں۔

قومی ٹیم کے چمکتے ستارے شاداب خان نے اپنے عید کے لباس میں تصویر شیئر کرتے ہوئے سب کو مبارک دی۔

جنید خان نے عید کی مبارک باد دیتے ہوئے کہا کہ یہ مبارک دن آنے والے سالوں میں ہم سب پر بہت برکتیں اور خوشیاں لائے۔

محمد عامر اپنی عید لندن میں منارہے ہیں اس حوالے سے انہوں نے ٹویٹر پر اپنی اسٹائلش تصویر پوسٹ کرتے ہوئے کہا کہ وہ عید کے موقع پر باہر ہیں۔

حسن علی نے منفرد انداز میں عید کے لباس میں قربانی کے جانور کے ہمراہ ٹویٹر پر تصویر شیئر کرتے ہوئے اہل وطن کو مبارک باد دی۔