اشتعال انگیز تقاریر بانی ایم کیو ایم کی جائیداد قرق کرنے کا حکم

انسداد دہشتگردی عدالت نے الطاف حسین کے دائمی وارنٹ گرفتاری جاری کرتے ہوئے جائیداد کی تفصیلات طلب کرلیں۔۔ فوٹو:فائل

---

انسداد دہشتگردی عدالت نے فوج کے خلاف اشتعال انگیز تقاریر کے کیس میں ایم کیو ایم کے بانی الطاف حسین کی جائیداد قرق کرنے کا حکم دے دیا۔

ایکسپریس نیوز کے مطابق اسلام آباد میں انسداد دہشت گردی کی عدالت کے جج شاہ رخ ارجمند نے پاک آرمی کے خلاف اشتعال انگیز تقاریر کے کیس کی سماعت کی۔ جج نے عدالت میں پیش نہ ہونے پر بانی ایم کیو ایم کی جائیداد ضبط کرکے نیلام کرنے کا حکم دیتے ہوئے الطاف حسین کے دائمی وارنٹ گرفتاری بھی جاری کردیے۔

یہ بھی پڑھیں: الطاف حسین اقدام قتل کے مقدمے میں مفرور ملزم قرار

انسداد دہشتگردی عدالت نے ملزم کی جائیداد کی تفصیل بھی طلب کرلی۔ بانی ایم کیو ایم کیخلاف تھانہ مارگلہ میں اشتعال انگیز تقاریر کا مقدمہ درج ہے۔ واضح رہے کہ بانی ایم کیو ایم الطاف حسین کو تھانہ گولڑہ، سیکرٹریٹ، بہارہ کہو اور تھانہ کوہسار کے کیسز میں پہلے ہی اشتہاری قرار دیا جاچکا ہے۔