سندھ کا سب سے بڑا کار لفٹر گروہ سمیت گرفتار 48 گاڑیاں برآمد

گرفتار گروہ نے وارداتوں کے لیے سی کمپنی کے نام سے گینگ بنا رکھا تھا، پولیس

Staff Reporter September 11, 2017

گرفتار گینگ سندھ بھر کے رینٹ اے کار سے کروڑوں روپے کی سیکڑوں گاڑیاں کرایے پر حاصل کر کے روپوش ہو گیا تھا۔ فوٹو: نیٹ

اینٹی کارلفٹنگ سیل پولیس نے سندھ کا سب سے بڑا کارلفٹر، جعلساز سی کمپنی نامی گینگ کے سرغنہ اور ماسٹر مائنڈ سمیت 4کارندوں کو گرفتار کرلیا۔

ڈی آئی جی سی آئی اے ڈاکٹر جمیل احمد کے خصوصی ٹاسک پر اے سی ایل سی آرٹلری میدان کے ایس ایچ او عابد حسین شاہ نے پولیس پارٹی کے ہمراہ نارتھ ناظم آباد اور دیگر علاقوں میں کاروائیاں کرتے ہوئے سندھ کے سب سے بڑے کارلفٹر و جعلساز گینگ کے سرغنہ اورماسٹر مائنڈ سمیت 4 کارندوں منیب احمد، زبیر مراد عرف شنٹو، محمد احمر علی اور محمد شیراز کو گرفتار کر کے ملزمان کے قبضے و نشاندہی پر 12گاڑیاں جن میں ایک مرسڈیز، 2ویگو، ایک ہائی روف، 6 ٹویوٹا کرولا اور ایک مہران کار برآمد کر لیں جبکہ لینڈ کروز سمیت مزید 36گاڑیاں گاڑی مالکان کی مدد سے قبضے میں لے کر ضابطے کی کاروائی کے بعد مالکان کے حوالے کر دیں، گرفتار گینگ نے ڈرامائی طور پر وارداتوں کے لیے سی( C)کمپنی کے نام سے اپنا گینگ بنا رکھا تھا۔

پولیس کے مطابق گرفتار گینگ گزشتہ 6سال سے کراچی و اندرونِ سندھ مختلف روپ دھار کر رینٹ اے کار سے ڈبل کرایے کا لالچ دیکر قیمتی گاڑیاں حاصل کر نے کے بعد دوسرے علاقوں میں کرایے پر حاصل کی گئیں گاڑیاں نصف قیمتیں وصول کر کے قسطوں پر فروخت کر دیتا تھا اور روپوش ہو جاتا تھا۔

ملزمان کا گینگ کراچی سمیت سندھ بھر میں رینٹ اے کار سے سیکڑوں گاڑیاں جن میں مرسڈیز، لینڈ کروز، ویگو، کاریں اور دیگر گاڑیاں شامل ہیں ڈبل کرایہ پر حاصل کر چکا ہے، ملزمان کروڑوں روپے مالیت کی گاڑیاں فروخت کر چکے ہیں، گرفتار گینگ کے خلاف کراچی کے مختلف تھانوں میں گاڑیاں چوری اور چھیننے و دھوکہ دہی کے مقدمات درج ہیں جب کہ پولیس گرفتار گینگ سے مزید تفتیش اور دیگر ساتھیوں کی گرفتاری کے لیے چھاپے مار رہی ہے۔