پریانکا چوپڑا نے آئٹم سانگ کی تیاری کر لی عریانیت نہیں ہوگی اداکارہ

عریانی کے بغیر آئٹم سانگ بھی یادگار بنایا جاسکتا ہے، پریانکا چوپڑا۔ فوٹو : فائل

---

بالی وڈ اداکارہ پریانکا چوپڑا سنجے گپتا کی نئی فلم''شوٹ آئوٹ ایٹ وڈالہ'' میں آئٹم سانگ کریںگی۔

اداکارہ نے اس آئٹم سانگ پر یادگار پرفارمنس دینے کے عزم کا اظہار کرتے ہوئے کہا ہے کہ اپنے اس پہلے آئٹم سانگ کے لیے تیاری کرلی ہے اس آئٹم سانگ کی دھوم مچے گی۔ بالی وڈ میں کچھ نیا کرنے جارہی ہوں ۔اس آئٹم سانگ میں کسی قسم کی کوئی قابل اعتراض چیز نہیں ہوگی ۔ فحاشی کا کوئی سین نہیں ہے کسی قسم کی بے ادبی نہیں کی جائے گی۔یہ آئٹم سانگ ماضی میں اداکارہ زینت امان پر فلمایا گیا مشہور گیت ''آپ جیسا کوئی میری زندگی میں آئے ''اور پروین بوبی پر فلمائے گئے گیت ''جیتے ہیں شان سے ''کی طرز پر ہوگا ۔

اس گیت کے بول ''ببلی بدمعاش ''ہیں اس کی دھن موسیقار انو ملک نے تیار کی ہے جب کہ اسے سنیدھی چوہان کی آواز میں ریکارڈ کیا جارہا ہے ۔بتایا گیا ہے کہ یہ گیت پریانکا چوپڑا کی جانب سے ''چکنی چمیلی ''اور''ہلکٹ جوانی ''جیسے آئٹم سانگز کا جواب ہوگا۔ اداکارہ کا کہنا ہے کہ عریانی کے بغیر آئٹم سانگ بھی یادگار بنایا جاسکتا ہے اور یہ بات اب ثابت کرنے جارہی ہوں ۔آئٹم سانگ کے لیے عمدہ پرفارمنس کو شائقین کبھی فراموش نہیں کرسکیں گے۔ایکتا کپورکی ہوم پروڈکشن کے لیے آئٹم سانگ پرفارم کرنے کے لیے تمام انتظامات کو حتمی شکل دیدی گئی ہے اداکارہ پریانکا چوپڑا کا کہنا ہے کہ۔

نئی فلموںمیںمنفرد پرفارمنس سے شائقین کی توجہ کا مرکز بنوں گی ۔ پریانکا چوپڑا نے کہا ہے کہ مزیدمحنت کروںگی اور کامیابی تک کوشاں رہوں گی۔ انھوں نے کہا کہ اچھی فلمیں بنانے کا سلسلہ جاری رکھوں گی ،فلم ''برفی''کی طرح نئے کردار تلاش کروں گی ۔آسکر ایوارڈ حاصل کرنے کے لیے بھی نئے سال میں عزم کررکھا ہے۔انھوں نے کہاکہ آسکر ایوارڈ سے فلم کے باہرہونے کے غم سے زیادہ خوشی بھارت کی جانب سے فلم کی نامزدگی تھی مجھے ایک بڑا اعزاز ملا ہے ۔ بالی وڈ اداکارہ پریانکا چوپڑا نے کہا ہے کہ وہ ماضی کی معروف اداکارہ زینت امان سے بہت متاثر ہیں ان کی پرفارمنس بہت اچھی لگتی ہے۔



ان کی بڑی مداح ہوں۔اب بھی وہ بہت عمدہ کام کرتی ہیں۔ جب کہ زینت امان نے کہا کہ اداکارہ پریانکا چوپڑا نے اپنی الگ شناخت بنائی ہے ۔یہ وقت پریانکا کا ہے ان کی اداکاری نے بہت متاثر کیا ہے، پریانکا کا کہنا ہے کہ شاہ رخ خان کے ساتھ کام کرکے خوشی ہوتی ہے بالی وڈ کنگ کی اداکاری سے متاثر ہوں ،شائقین ہماری جوڑی کو پسند کرتے ہیں، ادھر بالی وڈ کنگ بھی پریانکا چوپڑا کے ساتھ کام کرنے کے متمنی ہیں ۔ انھیں اپنے خلاف پھیلنے والی افواہوں کا بھی خوف نہیں ۔

بالی وڈ بادشاہ شاہ رخ خان پریانکا کے ساتھ ایک بارپھر کام کرنے کے لیے تیار ہوگئے ہیں ۔گوری خان اور کرن جوہر سے پریانکا کا جھگڑا سب ہی کو ہوگا ،لیکن کنگ خان بھول گئے ہیں گوری سے ایک سال تک رہنے والی ناچاقی کو بھی اس لیے ایک بار پھر پریانکا کے ساتھ نئی فلم کے لیے سرگرم دکھائی دیتے ہیں دریں اثنا اداکارہ پریانکا چوپڑا نے کہا ہے کہ میری کسی سے کوئی دشمنی نہیں ،سب ساتھی فنکاروں سے دوستانہ مراسم ہیں۔ قبل ازیں فلمی حلقوں کا کہنا تھا کہ کرینہ کپور اور پریانکا چوپڑا کے درمیان حقیقی معنوں میں صلح نہیں ہوسکی ۔فلم ''ہیروئن ''کے سیٹ پر پریانکا چوپڑا اور کرینہ کا گلے ملنا محض دکھاوا تھا اصل میں دونوں نے ہی دل میں ایک دوسری سے بغض رکھا ہوا ہے۔

جس کا اظہار ان کے اقدامات اور ایک دوسری کے بارے میں محتاط مگر تلخ ریمارکس سے بخوبی لگایا جاسکتا ہے۔ ادھر ارجن رام پال نے کہا ہے کہ پریانکا ہی میری فیورٹ اداکارہ ہیں ،ان کی فلم ''برفی ''میں پرفارمنس کو کوئی فراموش نہیں کرسکتا ،میں بھی ان کی اداکاری کا مداح بن گیا ہوں ۔ارجن رام پال نے کہا کہ پریانکا چوپڑا کی عمدہ پرفارمنس سے شائقین بہت لطف اندوز ہوئے ،ان کی نئی فلموں کا شائقین کو شدت سے انتظار ہے ،گزشتہ سال بھی پریانکا نے عمدہ کام کیا اور رواںسال بھی ان کی بے مثال اداکاری کے سبب ان کا ہوگیا ہے ۔ادھر بالی وڈ حلقوں کا کہنا ہے کہ پریانکا چوپڑا کی نئی فلموں سے بہت سی توقعات وابستہ کی جاسکتی ہیں۔ اداکارہ کی رواں سال آنیوالی اہم فلموں میں ''زنجیر ''کرش تھری ''، ''غنڈے''،''میری کوم ''اور ''ملن ٹاکیز ''شامل ہیں ۔

18جولائی 1982کو پیدا ہوئیں۔اداکارہ کے والدین بھارتی آرمی کے ڈاکٹرز ہیں 2000میں مس ورلڈ کا تاج پہنا۔ 2002میں تامل فلم سے فنی سفر کا آغاز کیا۔پہلی ہندی فلم ''ہیرو'' تھی مگر فلم ''انداز ''نے شہرت کی بلندیوں پر پہنچادیا۔نیشنل فلم فیئر ایوارڈ سمیت کئی اہم اعزازات جیتے۔بھارتی اخبار ''ہندوستان ٹائمز ''میں کالم بھی لکھے۔ گلوکارہ کی حیثیت سے بھی خود کو منوایا ،ان کی نئی البم ریلیز ہوئی تو دھوم مچ گئی۔ 2012میں پریانکا کے گیت ''ان مائی سٹی''کو بیسٹ سانگ قرار دیا گیا اسے تین کیٹگری کے لیے ورلڈ میوزک ایوارڈز ملے۔ 30سالہ اداکارہ نے کہا ہے کہ گلوکاری اور اداکاری کا سلسلہ جاری رکھتے ہوئے پرستاروں کے دل جیتنے کے لیے کوشاں رہوں گی لیکن بالی وڈ فلموں کے لیے گلوکاری نہیں کرونگی ۔