کراچی سمیت سندھ بھر میں 8 سے10 محرم تک ڈبل سواری پر پابندی رہے گی

محرم الحرم کے دوران لاؤڈ اسپیکر کے استعمال پر بھی پابندی ہو گی۔ فوٹو: فائل

---

محرم الحرام میں سیکیورٹی خدشات کے پیش نظر شہر قائد سمیت سندھ بھر میں موٹر سائیکل کی ڈبل سواری پر پابندی لگانے کا اعلان کیا گیا ہے۔

ایکسپریس نیوز کے مطابق دہشت گردی کے خدشات کے باعث سندھ حکومت نے 8 سے 10 محرم الحرام تک کراچی سمیت سندھ بھر میں موٹر سائیکل کی ڈبل سواری پر پابندی لگانے کا فیصلہ کیا ہے۔ اس کے علاوہ اسلحہ ساتھ لیکر چلنے اور اس کی نمائش پر بھی 60 روز کے لئے پابندی ہوگی۔ محکمہ داخلہ سندھ نے پابندی کا باقاعدہ نوٹیفکیشن بھی جاری کر دیا ہے۔

نوٹیفکیشن کے مطابق سادہ لباس سیکیورٹی گارڈز بھی اسلحہ ساتھ لیکر نہیں چل سکتے جب کہ پولیس موبائل سے مماثلت رکھنے والی پرائیویٹ گاڑیوں کے استعمال اور محرم الحرم کے دوران لاؤڈ اسپیکر کے استعمال پر بھی پابندی ہو گی۔