بھارتی شہر حیدرآباد دکن میں متعدد بم دھماکے20 افراد ہلاک 50 سے زائد زخمی

بھارتی ریاست آندھرا پردیش کے دارالحکومت میں متعدد بم دھماکوں کے نتیجے میں 20 افراد ہلاک اور 50 سے زائد زخمی ہوگئے۔

بھارتی میڈیا کے مطابق حیدر آباد دکن کے علاقے دل سکھ نگر میں تھیٹر اور بس اسٹاپ پر ہونے والے کئی بم دھماکوں کے نتیجے میں اب تک کی اطلاعات کے مطابق 20 افراد ہلاک اور 50 سے زائد زخمی ہوگئے ہیں، ریسکیو ٹیموں نے موقع پر پہنچ کر دھماکے میں ہلاک اور زخمیوں کو اسپتال منتقل کردیا ہے جہاں انہیں طبی امداد فراہم کی جارہی ہے۔ زخمیوں میں سے بعض کی حالت تشویشناک بتائی جارہی ہے، پولیس نے علاقے کو گھیرے میں لے کر شواہد اکٹھے کرکے تحقیقات شروع کردی ہے۔


بھارتی وزیر اعظم من موہن سنگھ نے دھماکوں کی مذمت کرتے ہوئے کہا ہے کہ دہشت گردی کی اس ظالمانہ کارروائی میں جو بھی عناصر ملوث پائےگئے انہیں قرار واقعی سزا دی جائے گی، انہوں نے عوام سے پُر امن رہنے کی بھی اپیل کی۔

بھارتی وزیر داخلہ سشیل کمار شندے نے نئی دہلی میں میڈیا کے نمائندوں سے بات کرتے ہوئے کہا کہ حیدرآباد دکن میں ہوئے بم دھماکوں کے بعد ان کی آندھرا پردیش کے وزیراعلیٰ سے بات ہوئی، ان کا کہنا تھا کہ 150 میٹر کے احاطے میں بم دھماکے کئے گئے۔

دوسری جانب حیدرآباد دکن میں کئی بم دھماکوں کے بعد دارالحکومت نئی دہلی میں سیکیورٹی انتہائی سخت کردی گئی ہے۔