منیشا لامبا فلم ’’ ضلع غازی آباد ‘‘ میں آج جلوہ گر ہوں گی

روٹین سے ہٹ کر کام کرنا چاہتی ہوں، اچھے کام کو ہی شہرت کا اصل وسیلہ سمجھتی ہوں،27 سالہ بالی وڈ اداکارہ کی گفتگو۔ فوٹو : فائل

---

بالی وڈ اداکارہ منیشا لامبا نئی فلم ''فلع غازی آباد ''میں آج جلوہ گر ہونگی ،اداکارہ دو گروپوں کی دشمنی کے درمیان محبت کے رنگ بکھیرتی نظر آئیں گی۔

اس فلم میں ویوک اوبرائے ارشد وارثی اور سنجے دت بھی اہم کردار نبھارہے ہیں ۔اداکارہ منیشا لامبا کا کہنا ہے کہ اس فلم میںعمدہ پرفارمنس سے فلم کی کامیابی کو یقینی بنانے کی کوشش کی ہے ۔اپنے کردار سے مطمئن ہوں ۔اس فلم میں پریتم کے میوزک نے بھی کمال کیا ہے۔ شائقین کو گیتوں پر میری پرفارمنس بھی یاد رہے گی ۔اداکارہ نے کہا ہے کہ سستی شہرت کی قائل نہیں ،اچھا کام کرکے سچی خوشی حاصل کرنا چاہتی ہوں ،نئی فلم میں اہم کردار نبھایا ہے۔ شائقین کی پسند کا خیا ل رکھتی ہوں۔

اپنی پرفارمنس کو بہتر بناکر آگے بڑھنے کے اصول پر کاربند ہوں ،فرضی کہانیاں اور سستی شہرت کے لیے میڈیا میں رہنے کی شعوری کوشش نہیں کرتی ۔اپنے کام کو ہی شہرت کا اصل وسیلہ سمجھتی ہوں ۔نئی فلم میں اپنے کردار سے مطمئن ہوں۔ آنیوالی فلموں میں بھی محنت کرکے الگ شناخت بنانے کی کوشش کروں گی ۔انھوں نے کہا کہ بالی وڈ میں متعدد فلمیں آفرز ہوئی ہیں ،2013 میں منفرد کردار کروں گی ۔روٹین سے ہٹ کر کام کرنا چاہتی ہوں ۔یکسانیت کو پسند نہیں کرتی ،آسانیاں پیدا کرنے کی سوچ بھی فم انڈسٹری کے لیے تباہ کن ہے ۔ایسے موضوعات ہیں جن پر ابھی کام کرنا باقی ہے۔

انھوں نے کہا کہ بالی وڈ میں بہت ٹیلنٹڈ لوگ موجود ہیں ،ان کی سوچ کا کینوس بھی وسیع ہے ۔عام لوگوں کو نیا کام پسند آتا ہے ،تفریح کا مقصد بھی نئی چیز لانا ہوتا ہے۔ فلموں کے ساتھ کمرشلز بھی کرتی رہوں گی اس طرح فنکار کو دو کام کرنے سے روکنا ممکن نہیں ایسی سوچ کو اب دفن کرنا ہوگا صحافی بنناچاہتی تھی مگر اس شعبے میں آگئی ہوں ۔کرداروں کی ورائٹی ہی اصل حسن ہے اور اس کو منفی سمجھ کر چھوڑنا درست نہیں ،انھوں نے کہا کہ نئی فلم ''قسمت کی کمپنی ''2013 میں ریلیز کی جارہی ہے اس فلم میں دیا مرزا کے ساتھ نظر آئوں گی۔



ہدایتکار کبیر کوشک کی اس فلم میں مجھے ایک منفرد کردار ملا ہے ،اس پر میں نے محنت بھی کی ہے اور امید ہے یہ فلم اور اس میں میرا کردار شائقین کو پسند آئے گا ۔بالی وڈ اداکارہ کا کہنا ہے کہ آنیوالی فلموں میں اب نئے اسٹائل اختیار کرنے پر توجہ دی جارہی ہے اس حوالے سے میں سمجھتی ہوں کہ فلم کی کہانی کے مطابق کردار کو فلمانے کا ہنر آنا بھی ضروری ہے اگر فلم کی کہانی سے کردار مطابقت نہیں رکھے گا تو پھر سارے اسٹائل دھرے رہ جائیں گے ۔واضح رہے کہ 18 جنوری 1985کو چنائی میں پیدا ہونے والی 27سالہ اداکارہ نے فنی سفر کا آغاز 2005میں شروع کیا ۔

ان کی پہلی فلم ''یہاں''تھی ۔29 جولائی 2005 میں یہ فلم سینماگھروں کی زینت بنی ۔اداکارہ نے دہلی یونیورسٹی سے انگلش آنرز کیا ۔اداکارہ نے بڑی ملٹی نیشنل کمپنیوں کے لیے اشتہاری مہم کے لیے بھی پرفارم کیا اور ان کی تشہیری فلمیں تمام ٹی وی چینلز سے آن ایئر ہیں۔ اداکارہ نے گلوکار ہمیش رشمیاں کی مشہور البم ''آپ کا سرور''کے ٹائٹل سانگ پر بھی پرفارم کیا ۔اداکارہ کی دوسری فلم ''کارپوریٹ''2006 میں سینمائوں کی زینت بنائی گئی ۔اسی سال مزید دوفلمیں کیں ان میں ''راکی ''اور فلم ''انتھونی کون ہے؟''میں جلوے دکھائے ۔2007 میں فلم ''ہنی مون ''میں منیشا نے زارا کا کردار بڑی خوبی سے نبھایا۔

اسی سال فلم ''دس کہانیاں ''میں منیشا پریا بن کر جلوہ گر ہوئیں ۔اداکارہ نے 2008میں فلم ''بچنا اے حیسنو''میں ماہی کا کردار نبھاکر دھوم مچادی ۔اسی سال فلم''کڈنیپ''میں سونیا کا کردار اداکیا پھر ''شریا ''میں پرفارم کیا ۔''انا میکا''میں جیا کے روپ میں جلوہ گرہوئیں ۔2010میں ''ویل ڈن ابا''میں مسکان کا کردار کیا ۔2011میں فلم ''بھیجا فرائی ٹو''میں جلوے دکھائے ۔اسی سال ان کی فلم ''ہم تم اور شبانہ''کے چرچے ہوئے اس میں بھی اداکارہ نے لیڈنگ لیڈی رول شبانہ کے نام پر کیا ۔پھر فلم ''کنٹریکٹ ''آئی اور اس کے بعد2012کے دوران فلم ''جوکر ''اور اب''ضلع غازی آباد '' میں پرفارم کرکے دل موہ لیے۔