خواجہ آصف نااہلی کیس سماعت کیلیے لارجر بینچ تشکیل

جسٹس عامرفاروق, جسٹس محسن اختر کیانی اور جسٹس حسن اورنگزیب پر مشتمل ہائی کورٹ کا بینچ 26 ستمبر سے سماعت کرے گا

ویب ڈیسک September 23, 2017

پی ٹی آئی رہنماعثمان ڈار نے اقامہ ظاہر نہ کرنے پر نا اہلی کی درخواست دے رکھی تھی؛فوٹوفائل

ہائی کورٹ نے اقامے کی بنیاد پروزیر خارجہ خواجہ آصف کو نااہل قرار دینے کی درخواست کی سماعت کیلیے لارجر بینچ تشکیل دے دیا ہے۔

ایکسپریس نیوز کے مطابق سابق وزیراعظم نواز شریف کے بعد وفاقی وزیر خارجہ خواجہ آصف بھی مشکل میں پھنس گئے، پی ٹی آئی کے رہنما عثمان ڈار نے اقامہ ظاہر نہ کرنے پر خواجہ آصف کے خلاف عدالت میں نااہلی کی درخواست دائر کر رکھی تھی اور اب ہائی کورٹ نے عثمان ڈار کی درخواست سماعت کے لیے مقرر کرلی ہے۔

اس خبرکوبھی پڑھیں: خواجہ آصف کی نااہلی کی درخواست، سماعت کیلیے لارجر بینچ تشکیل دینے کا فیصلہ

پاکستان تحریک انصاف کی درخواست پر خواجہ آصف کی نااہلی کا کیس ہائی کورٹ میں سماعت کے لیے مقرر کردیا گیا، جب کہ سماعت کے لیے 3 رکنی لارجزبینچ بھی تشکیل دے دیا گیا، لارجر بینچ میں جسٹس عامر فاروق، جسٹس محسن اختر کیانی اور جسٹس حسن اورنگزیب شامل ہیں، 3 رکنی لارجر بینچ کیس کی سماعت 26 ستمبر سے کرےگا۔

یہ خبر بھی پڑھیں:خواجہ آصف کی نا اہلی کے لیے تحریک انصاف نے درخواست دائر کر دی

درخواستگزار نے موقف اختیار کیا ہے کہ خواجہ آصف اور نواز شریف دونوں نے عدالت سے اقامے کی تفصیلات چھپائی تھیں، خواجہ آصف سابق وزیراعظم نواز شریف کی طرح منی لانڈرنگ میں ملوث ہیں، لہٰذا ان کی نااہلی بھی یقینی ہے۔