سنجھورو میں جگہ جگہ گندگی کے ڈھیر لگ گئے،گندہ پانی اہم شاہراہوں اور گلیوں میں جمع ، میونسپل انتظامیہ نے چپ سادھ لی۔

تفصیلات کے مطابق سنجھورو میں جابجا گندگی کے ڈھیر لگ گئے اور گندہ پانی گلیوں اور روڈوں پر جمع ہونے سے تالاب کا منظر پیش کرنے لگا ہے۔

ڈاکٹر اسٹریٹ، شہداد پور روڈ، شیخ محلہ، ظفر ٹائون و دیگر علاقوں میں گندہ پانی جمع ہوگیا جس کی وجہ سے نمازی حضرات، طلبا و طالبات کو شدید دشواری کا سامنا جبکہ مچھروں کی افزائش میں اضافہ ہورہا ہے۔ درجنوں خاکروب بھرتی کیے جانے کے باوجود بھی انتظامیہ صفائی کے کام کروانے میں ناکام ہے۔