بینظیرقتل حکومت نے پراسیکیوٹرکواپیل کی اجازت دیدی

اپیل رواں ہفتے دائرہو گی،پی پی کاپولیس افسران کی درخواستوں میں فریق بننے کا فیصلہ

Qaiser Sherazi September 25, 2017

پی پی کی طرف سے لطیف کھوسہ 27ستمبرکو ہائیکورٹ راولپنڈی بینچ میں پیش ہونگے فوٹو: فائل

حکومت نے بھی سرکاری طورپرسابق وزیراعظم بینظیر بھٹو قتل کیس کو لاہورہائیکورٹ راولپنڈی بینچ میں چیلنج کرنے کا فیصلہ کیا ہے جس میں پولیس افسران کی سزاؤں میں اضافہ،بری کیے گئے پانچوں ملزمان کو سزائے موت دلانے اور سابق صدر جنرل پرویز مشرف کیخلاف مقدمہ ری اوپن کرکے اس کی سماعت شروع کرنے کی استدعا کی جائے گی۔

ایف آئی اے نے پراسیکیوٹرزکو فیصلہ کیخلاف اپیل دائرکرنے کی اجازت دے دی گئی ہے۔یہ اپیل آج پیر سے شروع ہونے والے ہفتہ کے دوران بدھ یا جمعرات کو دائرکی جائے گی۔اس فیصلہ کی تصدیق کرتے ہوئے پراسیکیوٹر خواجہ امتیاز نے ایکسپریس کو بتایا کہ اس بابت اپیل تیارکر لی گئی ہے۔

ضروری دستاویزات بھی حاصل کر لی گئی ہیں جبکہ دوسری طرف پیپلز پارٹی نے بھی دونوں پولیس افسران سابق سی پی او سعود عزیز،ایس پی خرم شہزادکی ضمانت کی درخواستوں میں بھی فریق بننے کا فیصلہ کیا ہے، پیپلز پارٹی کی طرف سے لطیف کھوسہ27ستمبرکو ان درخواستوں میں ہائیکورٹ راولپنڈی بنچ میں پیش ہوںگے۔