اذلان شاہ ہاكی ٹورنامنٹ کے لئے 25 ركنی قومی ٹيم كا اعلان كرديا گيا

ٹيم ميں شکیل عباسی اور رضوان سینیئر سمیت 4 سينئر كھلاڑيوں کی جگہ 4 نئے كھلاڑيوں كو شامل كيا گيا ہے، اختر رسول فوٹو اے ایف پی

---

اذلان شاہ ہاكی ٹورنامنٹ كے لئے 25 ركنی قومی ٹيم كا اعلان كرديا گيا، محمد عمران ٹیم کے کپتان ہوں گے۔

لاہور ميں پاكستان ٹيم كے ہيڈ كوچ اختر رسول نے اذلان شاہ ہاكی كپ كے لئے قومی ٹيم كا اعلان كرتے ہوئے كہا كہ ٹيم ميں شکیل عباسی اور رضوان سینیئر سمیت 4 سينئر كھلاڑيوں کی جگہ 4 نئے كھلاڑيوں كو شامل كيا گيا ہے، محمد عمران ٹيم كے كپتان جبكہ عمران بٹ اور عمران شاہ گول كيپر ہوں گے، قومی ٹيم میں 7 متبادل كھلاڑی بھی شامل کئے گئے ہیں، ديگر كھلاڑيوں ميں حسيم احمد، محمد سليمان، كاشف علی، عرفان جونيئر، فريد احمد، عامر شہزاد، توثيق شفقت رسول، ارسلان دلبر، تصور عباس، عتيق الرحمان، رضوان جونيئر، جميل بھٹی، عمران جونيئر سمیت ديگر کھلاڑی شامل ہيں۔

قومی ٹیم کے ہیڈ کوچ اختر رسول نے امید ظاہر کی كہ اذالان شاہ ٹورنامنٹ ميں ٹيم اچھی كاركردگی كا مظاہرہ كرے گی۔ انہوں نے کہا کہ ٹیم میں نئے كھلاڑيوں كو موقع ديا گيا ہے تاكہ وہ اپنی صلاحيتوں كا بھرپور مظاہرہ كرتے ہوئے مستقبل ميں ٹيم ميں جگہ بناسكيں۔ 22واں اذلان شاہ ہاکی ٹورنامنٹ 9 مارچ سے 17 مارچ تک ملائشیا کے شہر ایپوہ میں کھیلا جائے گا۔