ملک کے مختلف شہروں میں موبائل فون سروس بحال

امن و امان کی صورت ھال کو یقیینی بنانے کے لیے موبائل فون سروس معطل کی گئی فوٹو: فائل

---

سیکیورٹی خدشات کے باعث ملک کے مختلف شہروں میں بند کی گئی موبائل فون سروس بحال ہو گئی۔

ملک کے مختلف شہروں میں 9 محرم الحرام کے جلوسوں کی سیکورٹی خدشات کے پیش نظر بند کی گئی موبائل فون سروس بحال ہو گئی ہے۔ موبائل فون سروس صبح 9 بجے سے بند کی گئی تھی۔

وفاقی دارالحکومت اسلام آباد سمیت کراچی، لاہور، پشاور، کوئٹہ، فیصل آباد، ملتان، سرگودھا، سکھر اور حیدرآباد حساس قرار دیے گئے جس کے پیش نظر ان شہروں میں موبائل سروس بند رکھی گئی تھی۔ موبائل فون سروس کی بندش سے شہریوں کا مواصلاتی رابطہ منقطع رہا جس سے انہیں رابطوں میں شدید پریشانی کا سامنا کرنا پڑا۔

یہ خبر بھی پڑھیں:کراچی میں موبائل فون سروس بحال، ڈبل سواری پر پابندی برقرار

دوسری جانب جلوسوں کی سیکورٹی کو فول پروف بنانے کے لیے بعض شہروں میں موٹرسائیکل کی ڈبل سواری پر پابندی بھی عائد ہے تاہم قانون نافذ کرنے والے ادارے، خواتین اور 12 سال سے کم عمر بچے اور صحافی حضرات کو اس پابندی سے مستثنیٰ قرار دیا گیا ہے۔

واضح رہے کہ گزشتہ روز بھی ملک بھر کے اہم شہروں میں موبائل فون سروس کو صبح 9بجے سے رات 10 بجے تک بند رکھا گیا تھا۔ وفاقی وزارت داخلہ نے سیلولر کمپنیوں کو 8،9اور 10محرم الحرام کو موبائل فون سروس بند رکھنے کے احکامات جاری کررکھے ہیں۔