وزیراعظم راجا پرویزاشرف نے بجلی کی طلب اور رسد میں فرق دور کرنے کے لیے ہرممکن وسائل استعمال کرنے کی ہدایت کرتے ہوئے کہا ہے کہ بجلی کا بریک ڈاؤن کسی کی غفلت کا نتیجہ ہوا تو سخت کارروائی کی جائے گی۔
ملک میں بجلی کی صورتحال پر غور کے لئے اسلام آباد میں وزیراعظم راجا پرویزاشرف کی زیرصدارت اجلاس ہوا جس میں وزیر خزانہ، مشیر پیٹرولیم اوروزیر پانی و بجلی احمد مختار سمیت دیگر حکام نے شرکت کی۔
وزارت پانی وبجلی کے حکام نے وزیراعظم کو بریفنگ دیتے ہوئے بتایا کہ بجلی کا بریک ڈاؤن فنی خرابی کے باعث ہوا،ملک کے زیادہ تر حصوں میں بجلی بحال کردی گئی ہےاور آج شام تک ملک بھر میں بجلی بحال کردی جائے گی۔ حکام کا کہنا تھا کہ بریک ڈاؤن کی ذمہ داری کے تعین کے لیے وزیراعظم کی ہدایت کے مطابق کمیٹی نے کام شروع کردیا ہے جو 7 روز میں اپنی رپورٹ پیش کرے گی۔