چائے کی پیالی ہلائیے اور ٹی وی بند کیجئے

حرکات نوٹ کرنے والے ویب کیم کے ذریعے گھر کے چمچے اور برتنوں کو بھی ریموٹ کنٹرول بنایا جاسکتا ہے۔

ویب ڈیسک October 06, 2017

میچ پوائنٹ سسٹم کے ذریعے صرف حرکات و سکنات سے ٹی وی اور دیگر آلات کو کنٹرول کیا جاسکتا ہے۔ فوٹو: فائل

بہت جلد آپ کو ریموٹ کنٹرول سے ٹی وی بند کرنے کی ضرورت نہیں ہوگی کیونکہ ایک حساس ویب کیم کے ذریعے گھریلو اشیا کو ریموٹ کنٹرول میں تبدیل کیا جاسکتا ہے اور یوں مختلف اشیا کی حرکات سے ٹی وی اور دیگر آلات کو کھولا اور بند کیا جاسکتا ہے۔

اس نظام کو 'میچ پوائنٹ' کا نام دیا گیا ہے جس کے ذریعے آپ مختلف اشیاء یا جسمانی حصوں کو بھی منتخب کرکے ان سے ٹی وی کنٹرول کرسکتے ہیں۔ صرف یہی نہیں بلکہ ٹی وی اسکرین مختلف آئی کنز کو ظاہر کرتا ہے جن کے انتخاب سےآپ چینل بدلنے یا آواز کم زیادہ کرنے کا کام لے سکتے ہیں۔ اس کے بعد کسی شے سے ہوا میں دائرہ بنائیں تو ریموٹ اس سے چینل بدلے گا۔ یا کپ کو حرکت دینے سے ٹی وی کی آواز کم یا زیادہ کی جاسکتی ہے اور اس کا ایک سلائیڈر خود ٹی وی اسکرین پر اس وقت تک دکھائی دیتا ہے جب تک کیمرہ اس شے کی حرکت نوٹ کرتا رہتا ہے۔

ایسے نظام اشیا اور لوگوں کی شناخت کرنے کےلیے بنائے جاتے ہیں لیکن ان کی پوزیشن میں تبدیلی سے وہ ناکام ہوجاتے ہیں۔ البتہ میچ پوائنٹ حرکات کو نوٹ کرتا ہے اور ضروری نہیں کہ وہ شے مکمل طور پر کیمرے کے سامنے بھی ہو۔ اسے لنکاسٹر یونیورسٹی کے کرسٹوفر کلارک اوران کے ساتھیوں نے تیار کیا ہے۔ کسی بے اختیاری حرکت اور اس کے نتیجے میں ٹی وی میں ہونے والی تبدیلی کو روکنے کےلیے آپ مخصوص اشارے منتخب کرسکتے ہیں جو اچانک واقع نہیں ہوتے مثلاً کسی شے کا ہوا میں دائرہ بنانا یا تیزی سے زگ زیگ میں کسی شے کو حرکت دینا وغیرہ۔

سرجری میں استعمال

اگر آپ کے ہاتھ مختلف کاموں میں مصروف ہوں تب بھی یہ نظام حرکات کی بنیاد پر احکامات صادر کرسکتا ہے۔ اسی طرح کھانا پکاتے ہوئے آپ لیپ ٹاپ استعمال کرسکتے ہیں۔ ماہرین کے مطابق آپریشن تھیٹر میں مصروف سرجن اس سے فائدہ اٹھاسکتے ہیں۔ مثلاً اگر سینئر سرجن اوزار کے ساتھ تھیٹر میں آپریشن کررہا ہے تو وہ بار بار اوزار نیچے نہیں رکھتا کیونکہ اس سے اوزار آلودہ ہونے کا خطرہ ہوجاتا ہے اور اب وہ اسکرین پر اشارے سے ہی معلومات حاصل کرسکے گا۔ اس طرح میچنگ پوائنٹ کو انفرادی استعمال کے لیے تیار کیا جاسکتا ہے۔

تاہم اب تک یہ نظام کم روشنی اور چھوٹی اشیا کےلیے بہت کارآمد ثابت نہیں ہوا ہے اور اس کی یہ خامی دور کرنے کی کوشش کی جارہی ہے۔