9پلیئرزڈربن پہنچ گئےٹیسٹ کرکٹرز کل جوائن کرینگےفیصل اورتنویرکی واپسی

شاہد آفریدی، شعیب ملک، عمراکمل،کامران اکمل، احمد شہزاد، وہاب ریاض،عمر امین، اسد علی اورذوالفقار بابر ڈربن پہنچ گئے، فوٹو : فائل

---

جنوبی افریقہ کیخلاف ٹوئنٹی20 اور ون ڈے سیریز میں قومی اسکواڈ کا حصہ بننے والے 9کھلاڑی لاہور سے براستہ دبئی گذشتہ روز ڈربن پہنچ گئے۔

جن میں شاہد آفریدی، شعیب ملک، عمراکمل،کامران اکمل، احمد شہزاد، وہاب ریاض،عمر امین، اسد علی اورذوالفقار بابر شامل ہیں، تیسرا ٹیسٹ ہارنے کے بعد قومی ٹیم بدستور سنچورین میں موجود ہے اور بدھ کو ڈربن پہنچے گی، یہاں جمعے کو پہلا ٹوئنٹی20 میچ ہو گا۔

دونوں شہروں میں موجود پاکستانی کرکٹرز منگل کو پریکٹس کریں گے۔ لاہور سے اسپورٹس رپورٹر کے مطابق لاہور سے روانگی کے وقت کھلاڑیوں کے ساتھ بورڈ کا کوئی بھی آفیشل موجود نہیں تھا، ایئرپورٹ پر جب میڈیا کے نمائندوں نے ان سے بات کرنا چاہی تو یہ کہہ کرانکار کردیا کہ پی سی بی کی جانب سے میڈیا سے گفتگوکی اجازت نہیں ہے۔ دریں اثنا ٹیسٹ اسکواڈ میں شامل بیٹسمین فیصل اقبال اورپیسر تنویر احمد گذشتہ روز کراچی واپس پہنچ گئے، سرفراز احمد، احسان عادل، راحت علی اور اظہر علی منگل کو وطن روانہ ہوں گے۔