دورۂ پاکستان کیلیے سری لنکن پلیئرز کی جانب سے بائیکاٹ کا خدشہ

فی الحال لاہور میں ٹی ٹوئنٹی میچ کھیلنے کیلیے جانے کے حق میں نہیں ہیں،پلیئر

Sports Desk October 10, 2017

آئی سی سی آفیشلز سے ملاقات میں سیکیورٹی کی صورتحال کا جائزہ لینگے،بورڈ۔ فوٹو: نیٹ

سری لنکن کرکٹرز کی جانب سے دورئہ پاکستان کے بائیکاٹ کا خدشہ پیدا ہوگیا۔

سری لنکا کیخلاف یواے ای میں جاری سیریز کے آخر میں ایک ٹی ٹوئنٹی میچ لاہور میں بھی شیڈول کیا گیا ہے،البتہ اس مقابلے کے حوالے سے مثبت اطلاعات سامنے نہیں آرہیں، مقامی میڈیا سے بات چیت میں ایک کرکٹرنے کہا کہ اس موقع پر پاکستان کی مدد کرنے کی ضرورت ہے لیکن کھلاڑی کیا سوچ رہے ہیں اس کو بھی جاننا ضروری ہوگا،ہماری ٹیم پر لاہور میں حملے کے بعد ہی پاکستان میں انٹرنیشنل کرکٹ کا سلسلہ ختم ہوا تھا، متاثرہ پلیئرز اس وقت اسکواڈ میں شامل نہیں لیکن ماضی کی تلخ یادیں اب بھی ستا رہی ہیں، فی الحال کھلاڑی ٹی ٹوئنٹی میچ کھیلنے کے لیے لاہور جانے کے حق میں نہیں ہیں، دیکھیں کیا فیصلہ ہوتا ہے۔

یاد رہے کہ اس وقت یواے ای میں سیریز کیلیے موجود سورنگا لکمل دہشت گردوں کا نشانہ بننے والی بس میں شامل تھے، چند روز قبل انھوں نے بھی کہا کہ تھا کہ میں وہ ڈراؤنا خواب کبھی نہیں بھلا سکتا۔

دوسری جانب بورڈ کے چیف ایگزیکٹو ایشلے ڈی سلوا نے کہاکہ رواں ہفتے آئی سی سی آفیشلز سے ملاقات میں سیکیورٹی کی صورتحال کا جائزہ لیںٹ گے، اگر انھوں نے گرین سگنل دیا تو ہمارا ایک خصوصی نمائندہ بھی پاکستان جائیگا، رپورٹ کی روشنی میں کوئی حتمی فیصلہ کرینگے۔