ایل او سی پربھارتی فوج کی بلااشتعال فائرنگ سے ایک شہری شہید 5 زخمی

پاک فوج نے بھرپور جواب دے کر بھارتی چوکیوں کو نقصان پہنچایا اور دشمن کی بندوقوں کو خاموش کرادیا، آئی ایس پی آر ،فوٹو : فائل

---

بھارتی فوج کی لائن آف کنٹرول پر ستوال اور نکیال سیکٹر پر بلااشتعال فائرنگ سے ایک شہری شہید اور5 زخمی ہوگئے ہیں۔

پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے ایک بار پھر ہٹ دھرمی کا مظاہرہ کرتے ہوئے سیز فائر کی خلاف ورزی کی اور ستوال اور نکیال سیکٹر پر بلااشتعال فائرنگ کی جس کے نتیجے میں ایک شہری شہید جب کہ بچوں سمیت 5 افراد زخمی ہوگئے جنہیں قریبی اسپتال منتقل کردیا گیا۔

آئی ایس پی آر کے مطابق بھارتی فوج نے شہری آبادی کےعلاوہ تتری نوٹ، مانوا، ستوال اور بالاکوٹ، پونچھ کراسنگ پوائنٹ پر بھی فائرنگ کی جس کا پاک فوج نے مؤثرجواب دیا اور بھارتی بندوقوں کوخاموش کرا دیا، پاک فوج کی فائرنگ سے بھارتی چوکیوں کا بھی بھاری نقصان ہوا۔

آئی ایس پی آر کا کہنا ہے کہ بھارتی فوج کےشہری آبادی کونشانہ بنانے سے کشمیریوں کی جدوجہد پرفرق نہیں پڑے گا۔