اجے اور میرے درمیان بہت ہی خاص رشتہ ہے تبو

اجے کے ساتھ کام کرکے بہت سکون محسوس ہوتا ہے،تبو؛فوٹوفائل

---

نامور بالی ووڈ اداکارہ تبو نےاپنے اوراجے دیوگن کے رشتے کے بارے میں بات کرتے ہوئےکہا ہے کہ ان کےاور اجے کے درمیان رشتے کی نوعیت بہت ہی خاص ہے اور یہی وجہ ہے کہ انہیں اجے کے ساتھ کام کرکے بہت خوشی محسوس ہوتی ہے۔

اداکارہ تبو منتخب فلموں میں ہی کام کرتی ہیں اورانہوں نے اپنے کیرئیرمیں زیادہ تر سنجیدہ کردار ہی ادا کیے ہیں، لہٰذا تبو کو مزاحیہ کردار میں دیکھنے کے لیے ان کے مداح شدیدبے چین ہیں، اپنے مداحوں کی خواہش کومدنظررکھتے ہوئے تبو نےروہت شیٹھی کی مزاحیہ فلم ''گول مال4''کا حصہ بننے کی حامی بھری ہے۔

''گول مال4'' روہت شیٹھی کی مزاحیہ فلم سیریز ''گول مال'' کا چوتھا حصہ ہے، اس سے قبل ریلیز کی گئیں پہلی تینوں فلموں نے باکس آفس پر شاندار بزنس کیا تھا، لہٰذا اپنی چوتھی فلم کو پہلی تینوں فلموں سے مختلف بنانے کے لیے روہت شیٹھی نے اداکارہ تبو کو فلم میں کاسٹ کیا ہے۔

تبو نے فلم میں اپنے کردار کے حوالے سے بات کرتے ہوئے کہا کہ انہوں نے کیرئیر میں زیادہ تر سنجیدہ کردار ہی اداکیے ہیں، ان کے مداح ان سے پوچھتے ہیں کہ وہ مزاحیہ فلموں میں کام کیوں نہیں کرتیں لہٰذا مداحوں کی خواہش کے مطابق تبو نے ''گول مال 4'' سائن کی تاہم ان کا کہنا ہے کہ مزاحیہ ہونے کے باوجود فلم میں ان کا کردارسنجیدہ نوعیت کا ہے۔

اس خبرکوبھی پڑھیں: تبو نے شادی نہ کرنے کی وجہ اجے دیوگن کو قرار دے دیا

فلموں میں کم کام کرنے سے متعلق اداکارہ کا کہنا تھا کہ میرے دور کی بہت کم اداکارائیں ہیں جو فلموں میں کام کررہی ہیں ، کم سے کم میں سال میں ایک فلم تو کررہی ہوں۔ فلم میں تبو کے مدمقابل اداکار اجے دیوگن مرکزی کردار ادا کررہے ہیں،اجے کے ساتھ کام کرنے کے حوالے سے تبو نے بات کرتے ہوئے کہا میرا اور اجے دیوگن کا رشتہ بہت خاص ہے، ہم نے کئی فلموں میں ایک ساتھ کام کیا ہے لہٰذا مجھے ان کے ساتھ کام کرکے بہت خوشی محسوس ہوتی ہے۔

واضح رہے کہ اس سے قبل بھی ایک انٹرویو کے دوران تبو نے شادی نہ کرنے کی وجہ اجے دیوگن کو قرار دیتےہوئے کہا تھا کہ میرے قریب آنے والے ہر لڑکے کو اجے دیوگن مارتے اور دھمکاتے تھے یہی وجہ ہے کہ آج تک کوئی لڑکا میرے قریب نہیں آیا۔