قوم لیاقت علی خان کے نقش قدم پر چلنے کا عزم کرے وزیراعظم

پاکستان کو ترقی پسند اور خوشحال ملک بنانے کے لیے کوئی کسر نہیں چھوڑیں گے، شاہد خاقان عباسی۔ فوٹو : فائل

---

وزیراعظم شاہد خاقان عباسی کا کہنا ہے کہ قائداعظم کی رحلت کے بعد لیاقت علی خان نے نوزائیدہ مملکت کی مضبوطی میں کلیدی کردار ادا کیا جب کہ آج قوم قائداعظم، علامہ اقبال اور شہید ملت کے نقش قدم پر چلنے کا عزم کرے۔

شہید ملت لیاقت علی خان کی 66 ویں برسی پر وزیراعظم شاہدخاقان عباسی کا اپنے پیغام میں کہنا تھا کہ لیاقت علی خان نے تحریک پاکستان کے دوران گرانقدر خدمات سرانجام دیں اور پہلے وزیراعظم کی حیثیت سے قوم کی خدمت کی، لیاقت علی خان قائداعظم محمد علی جناح کے مخلص اور قابل اعتماد ساتھی تھے جب کہ قائداعظم کی رحلت کے بعد لیاقت علی خان نے نوزائیدہ مملکت کی مضبوطی میں کلیدی کردار ادا کیا۔

اس خبر کو بھی پڑھیں : لیاقت علی خان کی آج 66ویں برسی عقیدت و احترام کیساتھ منائی جا رہی ہے

وزیراعظم کا کہنا تھا کہ آج قوم قائداعظم، علامہ اقبال اور شہید ملت کے نقش قدم پر چلنے کا عزم کرے، پاکستان کو ترقی پسند، خوشحال، روادار اور محفوظ ملک بنانے کے لیے کوئی کسر نہیں چھوڑیں گے۔