چیف جسٹس کے نام پر سرکاری ادارے کوجعلی خط موصول

خط میں سرکاری ٹی وی کی انتظامیہ کوبھرتیاں روکنے کے احکامات جاری کیے گئے. فوٹو آن لائن

---

QUETTA: سپریم کورٹ اورچیف جسٹس کے نام پرسرکاری ادارے کوجعلی خط بھیجنے کا انکشاف ہوا ہے۔ سپریم کورٹ نے خط جعلی ہونے کی تصدیق کردی۔ نجی ٹی وی کے مطابق جعلی خط کے ذریعے سپریم کورٹ کے انسانی حقوق کے سیل کی جانب سے سرکاری ٹی وی کی انتظامیہ کو بھرتیاں روکنے کے احکامات جاری کیے گئے اور باور کرایا گیا کہ یہ احکامات چیف جسٹس کی منظوری سے دیے جارہے ہیں۔

خفیہ خط میں لکھا گیا کہ یہ احکامات چیف جسٹس نے خفیہ ایجنسیوں کی رپورٹ پر صادر کیے ہیں ۔ تاہم سپریم کورٹ نے اس خط کوجعلی قراردیا ہے۔سپریم کورٹ کے حکام کاکہنا ہے کہ سپریم کورٹ انسانی حقوق سیل سے جانے والی ہدایات پرکسی افسر کے دستخط نہیں ہوتے یہ کوئی مفاد پرست عناصر ہیں جو چیف جسٹس اور سپریم کورٹ کا نام لے کر مذموم مقاصد حاصل کرنا چاہتے ہیں یہ خط جعلی ہے،این این آئی کے مطابق ذرائع کا کہنا تھا کہ کمپیوٹرریکارڈ میں اس خط کا حوالہ نمبر موجود نہیں ہے خط میں سپریم کورٹ کے انسانی حقوق سیل کے ڈائریکٹر کے جعلی دستخط موجود ہیں۔