شہر میں جاری ٹارگٹ کلنگ میں ملزمان نے 4 افراد کو موت کی نیند سلادیاجب کہ رینجرز نے اورنگی ٹاؤن بخاری کالونی میں سرچ آپریشن کرکے 20 سے زائد افراد مشتبہ افراد کو حراست میں لے کر نامعلوم مقام پر منتقل کردیا۔
کراچی میں نئے دن کا سورج طلوع ہوتے ہی دہشت گردوں نے انسانی خون سے ہولی کھیلنا شروع کردی، آج صبح گلشن معمار میں نامعلوم افراد نے فائرنگ کرکے اختر گبول کو ہلاک کردیا، ادھر گلشن معمار تھانے کے کورٹ محرر سپاہی ہادی بخش کو نامعلوم ملزمان نے سپر ہائی وے پر فائرنگ کرکے قتل کردیا اور موقع سے فرار ہوگئے ، پولیس کے مطابق واقعہ ٹارگٹ کلنگ کا نتیجہ ہے، فیڈرل بی ایریا النور سوسائٹی میں دانش عباس رضوی پر موٹر سائیکل سوار ملزمان نے فائرنگ کردی جس کے نتیجے میں دانش عباس رضوی موقع پر ہی جاں بحق ہوگیا، ملیر بکرا پیڑی جام گوٹھ سے ایک شخص کی تشدد زدہ لاش ملی جسے محمد عرفان کی حیثیت سے شناخت کرلیا گیا ، پولیس کے مطابق ملزمان نے عرفان کو اغوا کے بعد تشدد کا نشانہ بنانے کے بعد قتل کیا۔