مسلم لیگن اب صرف جی ٹی روڈ تک محدود ہوکر رہ گئی ہے قمرزمان کائرہ

مسلم لیگ(ن) نے ہمیشہ سیاست ایجنسیوں کی حمایت سے کی،(ن)لیگ نے ماضی میں آئی جے آئی بنائی اور یہ جماعت آج بھی آئی جے آئی بنا رہی ہے، قمرزمان کاائرہ فوٹو: فائل

---

ISLAMABAD: وفاقی وزیر اطلاعات و نشریات قمر زمان کائرہ نے کہا کہ شہباز شریف کو جنوبی پنجاب کے لوگوں نے مسترد کر دیا ہے اور ان کی جماعت اب صرف جی ٹی روڈ تک محدود ہو کررہ گئی ہے۔

لالہ موسیٰ میں جلسے سے خطاب کرتے ہوئے قمرزمان کائرہ نے کہا کہ شہباز شریف نے میٹرو بس سروس پر 100 ارب روپے خرچ کر دیئے،اگر پنجاب کا 70 فیصد بجٹ لاہور میں خرچ کیا جائے گا تو جنوبی پنجاب کے عوام تو اس پر احتجاج کریں گے۔ انہوں نے کہا مسلم لیگ(ن) نے ہمیشہ سیاست ایجنسیوں کی حمایت سے کی،(ن)لیگ نے ماضی میں آئی جے آئی بنائی اور یہ جماعت آج بھی آئی جے آئی بنا رہی ہے۔

قمر زمان کائرہ نے کہا کہ پیپلز پارٹی نے ملک کی اقتصادی ترقی کے لئے کئی کام کئے، خطے کی بہتری کے لئے گوادار پورٹ چین کے حوالے کی، چین کے تعاون سے گوادر میں سڑکوں کا جال بچھایا جائے گا۔ انہوں نے کہا کہ ملک کی توانائی کی ضروریات پوری کرنے کے لئے ایران سے معاہدہ کیا گیا۔