سندھ اسمبلی کی مدت پوری ہونے سے قبل قائد حزب اختلاف کا تقرر کردیا جائے گا نثار کھوڑو

سندھ اسمبلی کے اسپیکر نثار کھوڑو نے کہا کہ اسمبلی مدت پوری ہونے سے قبل قائد حزب اختلاف کا تقرر کردیا جائے گا۔


نثار کھورو نے اپنے دفتر میں پریس کانفرنس کرتے ہوئے کہا کہ وہ متحدہ قومی موومنٹ کے مینڈیٹ کا احترام کرتے ہیں لیکن ایم کیو ایم کے جن 30 ارکان کی اپوزیشن نشستوں کے لئے درخواست موصول ہوئی ہے کہیں یہ 30 ارکان ایم کیو ایم کا فارورڈ بلاک تو نہیں۔ انہوں نے کہا کہ وہ ایم کیو ایم کے قائد الطاف حسین سے درخواست کرتے ہیں کہ حکومت میں واپس آجائیں۔

اسپیکر سندھ اسمبلی نے کہا کہ مارچ کا مہینہ جمہوریت کی پر امن منتقلی پر جشن منانے کا مہینہ ہے، اس مہینے میں اسمبلی کی 15 دنوں کی کارروائی دیکھنے کے لئے وکلا، خواتین، دانشور، قانون دان، طلبہ اور اہم شخصیات کو دعوت دی جائے گی۔ انہوں نے کہا کہ 4 مارچ کو میڈیا، 6 کو دانشور، 8 کو خواتین، 11 کو قانون دان، 13 کو طلبہ اور 15 مارچ کو اہم شخصیات کو اسمبلی کی کارروائی دیکھنے کے لئے مدعو کیا جائے گا جبکہ 5 مارچ کو سندھ اسمبلی کے اراکین کا فوٹو سیشن ہوگا۔