شریف فیملی کو رعایت دینا ملک سے غداری ہوگی طاہر القادری

نواز شریف عادی بھگوڑا ہے، فیصلے آنے سے پہلے بھاگ جائیگا،سربراہ عوامی تحریک

Numainda Express October 22, 2017

معاشی دہشت گرد کی جگہ قاتل اعلیٰ کولایا گیا تو بحران طوفان میں بدلے گا، طاہر القادری۔ فوٹو: فائل

عوامی تحریک کے سربراہ طاہرالقادری نے کہا ہے کہ نوازشریف کو رعایت دینے کا مطلب آئین، عدلیہ سے کھلا انحراف اور ملک و قوم سے غداری ہوگی۔

گزشتہ روز طاہر القادری نے پارٹی کی سینٹرل کور کمیٹی کے ممبران سے ٹیلی فون پر گفتگو کرتے ہوئے کہا کہ نواز، شہباز دونوں قومی لٹیرے ہیں، معاشی دہشت گرد کی جگہ قاتل اعلیٰ کو لایا گیا تو بحران طوفان میں بدلے گا، ادارے گلے، سڑے اور کرپشن زدہ متعفن نظام کے بجائے پاکستان کو بچانے کی فکر کریں، سپریم کورٹ کی طرف سے جھوٹا ثابت ہونے والے شخص کو پارٹی صدر بناکر پوری ن لیگ نے قوم کو یہ واضح پیغام دیا ہے کہ ہم جھوٹ،کرپشن اور لوٹ مار کے حامی ہیں اور ہمارے نزدیک سپریم کورٹ کے فیصلوں، آئین، قانون، جمہوری اخلاقیات کی کوئی حیثیت نہیں۔

سربراہ عوامی تحریک نے کہا کہ نوازشریف عادی بھگوڑا ہے، یہ اپنا ساز و سامان بیرون ملک شفٹ کرچکے ہیں،ان کا پاکستان میں اقتدارکے علاوہ کچھ بھی نہیں ہے، جب تک خائن کی باقیات اقتدار میں ہیں یہ آتا جاتا نظر آتا رہے گا، جب یہ امید بھی ٹوٹ گئی تو پھر فیصلے آنے سے پہلے ہی بھاگ جائے گا، فرد جرم کا ہر حرف سچ پر مبنی ہے اور جو کرپشن اب تک سامنے آئی اس کی حیثیت سمندر کے ایک قطرے جیسی ہے، ان کے بیشتر اثاثے اور اکاؤنٹس ابھی پردہ راز میں ہیں جب کہ لوٹی گئی دولت واپس لانا احتساب کے اداروں کی اصل آزمائش ہے۔

طاہر القادری نے کہا کہ نوازشریف معاشی دہشت گرد ثابت ہوچکا، قاتل اعلیٰ کے کرتوت جسٹس باقر نجفی کمیشن کی رپورٹ میں ہیں، جس دن یہ رپورٹ منظر عام پر آجائے گی سانحہ ماڈل ٹاؤن کے قاتلوں کے چہروں پر پڑا ہواپردہ اٹھ جائے گا۔ہم جسٹس باقر نجفی کمیشن رپورٹ کے پبلک ہونے کا انتظار کررہے ہیں۔