تیسرے ٹی ٹوئنٹی میچ کے انتظامات میں تیزی آگئی

نشتر اسپورٹس کمپلیکس لاہورکا پورا علاقہ کل سے مکمل طور پر بند کرنے کا فیصلہ

Sports Reporter October 24, 2017

سری لنکن ٹیم کی آمد سے 2روز قبل تمام ملحقہ اسٹیڈیمز میں کھیلوں کی سرگرمیاں معطل کر دی جائیں گی۔ فوٹو : فائل

لاہور میں سری لنکا سے ٹی ٹوئنٹی میچ کے انتظامات میں تیزی آگئی۔

گزشتہ روز قذافی اسٹیڈیم میں شیڈول سری لنکا سے ٹی ٹوئنٹی میچ کیلیے تیزی سے انتظامات مکمل کیے جا رہے ہیں، سالڈ ویسٹ مینجمنٹ اور پی سی بی کا عملہ قذافی اسٹیڈیم میں اسٹینڈز کی صفائی کیلیے سرگرم نظر آیا، تمام کرسیوں کو پائپ لگا کر دھونے کا سلسلہ جاری رہا، ٹوٹی ہوئی کرسیاں تبدیل کرنے کے ساتھ مرمت بھی کی جاتی رہی، ڈریسنگ روم کی صفائی اور رنگ و روغن بھی ہو رہا ہے، ورلڈ الیون سے سیریز کے بعد موسم بہتر ہونے سے میدان بھی زیادہ سرسبز نظر آرہا ہے جب کہ روڈز پر لائٹس کی تنصیب کاکام شروع کردیا گیا۔

دوسری جانب قذافی اسٹیڈیم کے اطراف میں نشتر اسپورٹس کمپلیکس کا پورا علاقہ 25 اکتوبر سے مکمل طور پر بند کرنے کا فیصلہ کیا گیا ہے، 29 اکتوبر کو میچ مکمل ہونے تک لبرٹی چوک سے فیروز پور روڈ تک عام ٹریفک کی آمد مکمل طور پر بند رہے گی، پیدل آنے والوں کو مکمل جامہ تلاشی کے بعد نشتر اسپورٹس کمپلیکس میں آنے کی اجازت ملے گی، سری لنکن ٹیم کی آمد سے 2روز قبل تمام ملحقہ اسٹیڈیمز میں کھیلوں کی سرگرمیاں معطل کر دی جائیں گی۔

دریں اثنا لاہور کی ضلعی انتظامیہ نے تیاریوں کا آغازکر دیا، ڈپٹی کمشنر سمیراحمد سید نے تمام اسسٹنٹ کمشنرز، ڈپٹی سی اوز اور ایم اوزکی ڈیوٹیاں لگا دی ہیں۔

یاد رہے کہ سری لنکن ٹیم کی 28 اکتوبر کولاہور آمد شیڈول ہے،اگلے روز واحد ٹوئنٹی 20 میچ کھیلنے کے بعد پیر کوآئی لینڈرزوطن روانہ ہو جائیں گے۔