امریکا کیلیے پی آئی اے کی آخری پرواز 28 اکتوبر کو اڑان بھرے گی

10برسوں کے دوران امریکاکے روٹ پر پی آئی اے کو23 ارب کا خسارہ ہوچکا، مشیر ہوا بازی

Staff Reporter October 24, 2017

10برسو ں کے دوران امریکاکے روٹ پر پی آئی اے کو23 ارب کا خسارہ ہوچکا، مشیرہوابازی۔ فوٹو:فائل

امریکا کے لیے پی آئی اے کا فضائی آپریشن بند کرنے کے اعلان کے بعد قومی ایئر لائن کی آخری پرواز 28اکتوبر کو امریکا کیلیے اڑان بھرے گی۔

ذرائع کا کہنا ہے کہ پی آئی اے کی مانچسٹر نیویارک جانے والی پرواز کو مسلسل خسارے کے باعث بند کیا جارہاہے اورا س سلسلے کی آخری پرواز پی کے 711 ہفتہ 28 اکتوبر کوروانہ ہوگی، آخری پرواز کے حوالے سے کیبن اور کاک پٹ کریو کو مطلع کردیا گیا ہے، پرواز کے ہمراہ بطور کریو جانے والے عملے کو کسی دوسری ایئرلائن سے نیویارک سے ٹورنٹو اور بعدازاں وطن واپس پہنچایاجائے گا جبکہ ذرائع کا کہناہے کہ ماضی میں2مرتبہ امریکا کا فضائی آپریشن بند کرنے کی کوشش کی گئی۔

دوسری جانب وزیراعظم کے مشیر برائے ہوابازی مہتاب خان عباسی ایک موقع پر غیر رسمی گفتگو کے دوران اس بات کا انکشاف کرچکے ہیں کہ گذشتہ10برسو ں کے دوران امریکاکے روٹ پر پی آئی اے کو23 ارب روپے کا خسارہ ہوچکاہے۔

ترجمان پی آئی اے امریکا کے لیے پروازوں کی بندش کے حوالے سے واضح موقف دینے سے گریزاں دکھائی دیے۔ ان کا کہنا تھا کہ مانچسٹر تا نیویارک پی آئی اے کی ہفتہ وار ایک پرواز آپریٹ کی جارہی ہے تاہم جن مسافروں نے آگے کے لیے بکنگ کرائی ہے ان کوسہولت فراہم کی جائے گی۔