خاتون چہرے اور ہاتھ سے خون نکلنے کی پراسرار بیماری میں مبتلا

اٹلی کی 21 سالہ خاتون کے چہرے اور ہاتھوں سے پسینے کے بجائے خون بہتا ہے۔ فوٹو: فائل

---

اٹلی کی رہائشی خاتون ایسی پر اسرار بیماری میں مبتلا ہے جس کے چہرے اور ہاتھ سے پسینے کے ساتھ خون بھی آتا ہے۔

دنیا بھر میں آئے دن نت نئی اور مختلف نوعیت کی بیماریاں دیکھنے میں آتی ہیں جب کہ کسی بھی شخص کو زیادہ پسینہ آنے یا نہ آنے کے واقعات بھی رپورٹ ہوئے ہیں تاہم آج تک ایسی کوئی رپورٹ سامنے نہیں آئی جس میں کسی شخص کے چہرے سے پسینے کے بجائے خون بہتا ہو۔

غیرملکی خبر رساں ادارے کے مطابق اٹلی کے اسپتال میں ایسا کیس سامنے آیا جہاں 21 سالہ خاتون گزشتہ 3 سال سے عجیب بیماری میں مبتلا ہے جس میں خاتون کے چہرے اور ہاتھ کی جلد سے پیسنے کے بجائے خون نکلتا ہے۔ یہ عمل اس وقت ہوتا ہے جب خاتون سورہی ہوتی ہے یا کسی قسم کی جسمانی ورزش میں مصروف ہو جب کہ اس جگہ کسی قسم کا زخم موجود نہیں اور نہ ہی ان کے خون میں کسی قسم کی خرابی پائی جاتی ہے۔

An unusual condition causes a young woman to sweat blood https://t.co/oRAxClZtog *gated #primarycare #dermatology #hematology pic.twitter.com/YOcAK9Qs4E

— CMAJ (@CMAJ) October 23, 2017

ڈاکٹرز کے مطابق ممکن ہے کہ یہ بیماری ہیماتھوڈیروسس بھی ہو سکتی ہے جو کہ ایک غیر معمولی بیماری ہے جس میں پسینے کی جگہ خون آتا ہے تاہم حتمی وجہ ابھی تک ایک راز ہے۔ ڈاکٹرز کا کہنا تھا کہ خاتون کے چہرے سے خون کا اخراج اس وقت ہوتا ہے جب وہ بہت زیادہ ذہنی تناؤ کا شکار ہوتی ہے اور یہ عمل ایک سے 5 منٹ تک جاری رہتا ہے۔

خاتون کا کہنا ہے کہ وہ کسی قسم کے نفسیاتی مرض میں مبتلا نہیں اور نہ ہی اُن کے خاندان میں کسی کو اس طرح کی بیماری ہے تاہم اس بیماری کی وجہ سے وہ ہر وقت پریشانی کا شکار رہتی ہے جب کہ وہ اپنے دوستوں اور اہل خانہ سے بھی کٹ کر رہ گئی ہے۔