بدین کی ترقی کو ہمیشہ اپنا فرض سمجھا ڈاکٹر فہمیدہ مرزا

ریکارڈ ترقیاتی کام کرائے‘ مختلف اسکیموں کی افتتاحی تقریب سے خطاب۔ فوٹو: فائل

---

اسپیکر قومی اسمبلی ڈاکٹر فہمیدہ مرزا کادورہ بدین ، اسپیکر نے سابق صوبائی وزیر داخلہ ڈاکٹر ذوالفقار مرزا اور رکن صوبائی اسمبلی حسنین مرزا کے ہمراہ بدین کے 20 سے زائد دیہاتوں میں گیس اور بجلی کی فراہمی اور پختہ سڑکوں کی تعمیر کی مختلف اسکیموں کا افتتاح کیا۔

اسپیکر قومی اسمبلی نے ترقیاتی اسکیموں کی افتتاحی تقریب سے خطاب کرتے ہوئے کہا ہم نے تعمیر و ترقی کو اپنا فرض سمجھا اور عوام سے ہر حال اور ہر صورت میں رابطہ رکھا،انھوںنے کہا کہ عوام نے بھی ہمیشہ پیپلز پارٹی اور ہم پر اعتماد کرتے ہوئے ہمیں بھاری اکثریت سے کامیاب کرتے ہوئے موسمی اور خودساختہ سیاستدانوں کو مسترد کیا۔



انھوں نے کہا کہ جعلی سیاستدان انتخابات قریب آتے ہی عوام کے ہمدرد بن گئے ہیں جبکہ ووٹ لینے کے بعد غائب ہوجاتے ہیں، انھوں نے کہا کہ ہمارا عوام سے رابطہ نیا نہیں، ہم عوام میں سے ہیں اور عوام سے ہمارا ناطہ ختم ہونے والا نہیں ہے، ہماری جمہوری حکومت نے 5 سال میں ریکارڈ اور تاریخی ترقیاتی کام کرائے اور بے روزگاری اور غربت کے خاتمے کے لیے عملی اقدامات کیے اور لاکھوں نوجوانوں کو روزگار مہیا کیا۔