انتخابات میں پیپلز پارٹی کا 50 سیٹیں جیتنا بھی کرشمہ ہوگا پیر پگارا

پیپلز پارٹی نے گزشتہ 5 سالوں میں جس طرح ملک کو چلایا اسی وجہ سے اس کی مقبولیت میں قدرے کمی آئی ہے، پیرپگارا فوٹو: ایکسپریس

---

پاکستان مسلم لیگ فنکشنل کے سربراہ پیر پگارا نے کہا ہے کہ پیپلز پارٹی اگر آئندہ انتخابات میں 50 سے زائد سیٹیں بھی جیت لیتی ہے تو وہ قدرت کا کرشمہ ہو گا۔

لال حویلی میں عوامی مسلم لیگ کے سربراہ شیخ رشید احمد سے ملاقات کے بعد میڈیا کے نمائندوں سے بات کرتے ہوئے پیرپگارا نے کہا کہ ہمارا خیال تھا کہ سندھ میں پیپلز پارٹی کو واضح اکثرت حاصل ہو گی لیکن لوگوں کی پیپلز پارٹی کے خلاف رائے جاننے کے بعد اب ایسا ہوتا ممکن نظر نہیں آتا۔ انہوں نے کہا کہ قومی اسمبلی کی 340 سیٹوں میں سے اگر پیپلز پارٹی 50 بھی حاصل کرلے تو یہ ایک کرشمہ ہو گا۔

پیر پگارا نے کہا کہ پیپلز پارٹی نے گزشتہ 5 سالوں میں جس طرح ملک کو چلایا اسی وجہ سے اس کی مقبولیت میں قدرے کمی آئی ہے، پیپلز پارٹی نے اپنی ناقص پالیسیوں اور خراب طرز حکومت سے ملک کو کافی پیچھے دھکیل دیا ہے۔ انہوں نے کہا کہ اب جو بھی جماعت حکومت میں آئے گی اسے پیپلز پارٹی کی خراب کارکردگی کے نتائج بھگتنا ہوں گے۔