میرپور بٹھورو میں پرانی دشمنی پر ایک شخص کا قتل

ایس ایچ او غلام حسین سومرو نے بتایا کہ جب بھی ورثا مقدمہ درج کرائیں گے اس پر کارروائی ہوگی. فوٹو: فائل

---

میرپور بٹھورو میں فائرنگ، 20 سالہ نوجوان جاں بحق۔

تفصیلات کے مطابق میرپور بٹھورو شہر کے مہر شاہ بازار میں گاؤں سانوں سیال کے رہائشی 20 سالہ ایوب ولد غلام علی سیال دودھ سپلائی ڈرم لے کر پہنچے جہاں موٹر سائیکل پر سوار 2 نامعلوم مسلح افراد نے نوجوان پر فائر کرکے اسے قتل کردیا اور فرار ہوگئے۔



فائرنگ کے بعد جائے وقوع پر سیکڑوں شہری جمع ہوگئے جبکہ متوفی کے بھائی حبیب اللہ سیال اور شہری لاش تعلقہ اسپتال لائے، اطلاع ملتے ہی پولیس بھی اسپتال پہنچی اور ضروری کارروائی کے بعد لاش کو ورثا کے حوالے کردیا گیا۔ واضح رہے کہ 8 سال قبل متوفی کے والد غلام علی سیال کو سجاول میں پرانی دشمنی میں قتل کردیا گیا تھا جبکہ 18 ماہ قبل زمین کے تنازع پر متوفی کے 3 بھائی بھی قتل ہوگئے تھے۔

دوسری جانب ایس ایچ او غلام حسین سومرو نے بتایا کہ جب بھی ورثا مقدمہ درج کرائیں گے اس پر کارروائی ہوگی اور ملزمان کو ہر صورت گرفتار کیا جائے گا۔