چین کی 5 منزلہ لائبریری جسے دیکھ کر آپ دنگ رہ جائیں گے

34 ہزار مربع میٹر وسیع 5 منزلہ لائبریری تعمیر کا ایک شاہکار ہے جس میں 12 لاکھ کتابیں موجود ہیں۔

ویب ڈیسک November 17, 2017

چین کے علاقے تیانجن میں بنی شاندار لائبریری کو لوگ دور دور سے دیکھنے آتے ہیں۔ فوٹو: بشکریہ چائنا ڈیلی

MANCHESTER, UK: چین کے شہر تیانجن میں حال ہی میں ایک شاندار لائبریری کا افتتاح ہوا ہے جو خوبصورتی، ڈیزائن اور سہولت کا ایک شاہکار ہے۔

اس لائبریری کی خوبصورتی دیکھ کر عقل دنگ رہ جاتی ہے اور دیکھنے والے کے ہوش اڑجاتے ہیں کیونکہ یہ کتابوں کی عظمت کے عین شایانِ شان بنائی گئی ہے۔ پانچ منزلہ لائبریری 34 ہزار مربع میٹر پر پھیلی ہوئی ہے اور اس میں 12 لاکھ کتابیں موجود ہیں۔

پورا ہال بیضوی انداز میں بنایا گیا ہے اور درمیان سے دیکھا جائے تو اس پر آنکھ کا گمان ہوتا ہے۔ یہ لائبریری تیانجن شہر میں واقع، چین کے ثقافتی ضلعے بنہائی میں قائم کی گئی ہے جہاں لوگوں کا تانتا بندھا رہتا ہے۔

یہاں لوگ کتابیں نہ بھی پڑھیں تب بھی گھوم پھر کر لائبریری ضرور دیکھتے ہیں۔ اسے ڈنمارک کی ایک فرم ایم آر ڈی وی نے تیانجن کے شہری منصوبہ بندی کے ادارے کے ساتھ مل کر ڈیزائن کیا ہے جسے 'بنہائی کی آنکھ' کا نام دیا گیا ہے۔

اس کی تکمیل میں تین سال لگے جبکہ اس میں نیچے پڑھنے کا علاقہ ہے، درمیان میں دفاتر اور میٹنگ رومز ہیں۔ ان کے علاوہ کمپیوٹر، آڈیو ویڈیو اور دیگر کمرے بھی قائم کیے گئے ہیں۔ یہاں آنے والے لوگ پڑھتے دوران بھی اس عمارت کی ڈیزائننگ اور تعمیر کو دیکھتے رہتے ہیں اور خوش ہوتے ہیں۔