الیکشن کمیشن کی بے بسی افسوس ناک ہےڈاکٹرطاہرالقادری

پاکستان عوامی تحریک کے سربراہ ڈاکٹرمحمد طاہرالقادری نے کہا ہے کہ الیکشن کمیشن کی طرف سے جعلی ڈگری والوں کو الیکشن لڑنے سے روکنے کے معاملے پر بے بسی کا اظہار انتہائی افسوس ناک ہے۔

جعلی ڈگری ثابت ہونے کے بعد ممبر آرٹیکل63-F کے تحت صادق اورامین نہیں رہتا اور الیکشن لڑنے کے لیے نااہل ہوجاتا ہے۔ جمعرات کو اپنے بیان میں انھوں نے کہا کہ جعلی ڈگریوں کے معاملے پر الیکشن کمیشن کا واضح کہنا کہ ہم ایسوں کو الیکشن لڑنے سے نہیں روک سکتے۔




یہ ملک کا مستقبل داؤ پر لگانے کے مترادف ہے۔ انھوں نے کہا کہ ریٹرننگ آفیسر کو آئین کے تقاضے پورے نہ کرنے والے امیدوارکو الیکشن لڑنے سے روکنے کا پورا اختیار ہے۔

ڈاکٹر طاہرالقادری نے کہا کہ اصلاحات کے بغیر الیکشن ملک کو توڑنے کی سازش ہوگی۔ پوری قوم کو ملک کے مستقبل کے تناظر میں اپنی ذمے داریوں کو پہچاننا ہوگا اور سیاسی بیداری کا ثبوت دینا ہوگا ورنہ آنے والا الیکشن پچھلے 5سال سے بھی بدتر حالات لے کر آئے گا۔